Lucknow nung kiyimsang aser kinungertem kou ongdoktsü

Lucknow, Mongputeni (October) 22 (Agencies): Deobarnü kiyimba benjung ka nung kiyimsang, tebu aser tenu nungertem kiyimlar kinungertemi tejashi nung kou ongdoktsü.
Iba ya Lucknow kübok Kurramnagar tesem nung Deobar aonung atalok. Tebursangeri kiyimtsü atema rongsen aser sen (dowry) kanga meshiba atema tejashi nung kiyimlar kinungertemi iba mapa inyak.
Tebursangji Barabanki nung alir Abdul Kalam lir aser pa Khurramnagar nung aliba Saheed Zia-ul-Haq park nung tetsür ka den kibong akümtsüba sentong liasü.
Kiyimtsü anogo atongtsü hopta ka shi lia kiyimsangi motorcycle ka meshi aser iba amaji kiyimba anogo nung kiyimlar kibongi pa nem ‘Pulsar’ ka agütsü. Ajisüaka, tebursangi ibaji maginü aser ‘Apache’ bike ang ka meshi.
Kiyimlar kinungeri kiyimsangi ashibaji mulunga agizük saka ano pai par dang hon azük tulu ka meshi. Iba mapang kiyimsang aser pa meina arurtemji yi jemer liasü aser parnoki kiyimla tebu tsüngdang yimya tamajungtem benshi.
Kiyimtsü tebuji aonsotsü ayoker ka lir aser kiyimsangi talitabong meshiba atema benjung nung adeni arurtemi tetsürlar pusema tiyongtsü ai. Idangji kiyimsang meina arurtemi lendong ataloktsü ta ajiteta tesem toktsür ao.
Ajisüaka, kiyimsang den tebu aser tenu nunger kiyimlar kinungertemi apu aser parnok park kati anir oa kou ongdoktsü. Iba sülen par asem police ket nung agütsü.