Lucknow tetsür college nung napkin ayokba kol amenokogo

Lucknow, August 11 (Agencies): Biology tsütsü nungibo tetsürtem ita shia azü aoba ya yimya ka ama tetshir aser züngshir, ajisüaka India nungbo iba ya kenyongi maksütsü mapa aser tebang agi adoka mejembila mapa ka ama kümdaktsü.

Tetsürtem ita shia azü aoba ya India nung maksütsü mapa amai kümdaktsüba ajanga tetsürtem tali tasü mait kümdaktsür aser parnok nüngdakba sadema melemsatepteter.

Aji oda süaka, joko iba amala tebilemba asenok kolak nungi tugodaktsütsü mapang tongogo. Joko tetsürtemia iba indang kanga sadoka jembir aser azü aoba nung meteta aliyim lemsateptsü tenzükogo.

Osang tajung kaji, Lucknow nung aliba Avadh Girls’ Degree College (AGDC) nung ketdangsertemi college telung nung sanitary napkin ayokba kol ka amenoktsüogo aser iba ya India nung mezüng asütsü.

Iba mera tasen ya kaketshirtemi kanga pela agizükogo kechiba süra parnok joko napkin mela mela angutsü.

Mezüngbo dokan nung sanitary napkin alitsü asüngdanga jajabaji kanga nema madangtsüka liasü saka dangbo parnoki kol nungi mashi mapang ibaji agizüka amshitettsü. Iba kol yagi sanitary napkin shia sen 10 agitsü aser iba kol ya tetsür metsü meshidang takdang nung amenokja lir.

Iba ya dang masü saka Lucknow University, tetsürtem college nung tetsür department ajanga sanitary napkin yangluba unit ka lapoktsü asoshi maparen tenzükogo.

Parnoki iba yangluba ya ‘Menstrual Man of India’ ta ajasang, Arunachalam Muruganantham indang inyakyim dak ajemdaker lapoktsü sentong lir.