Lucknow:Dengue nokdangtsü mechi school uniform melentsü

Lucknow, August 20 (Agencies) : Uttar Pradesh yimtiba, Lucknow nung dengue tashidak tali prokshia aoba agi district ketdangsertemi tekaraba nung school tanurtem indang unifom melentsü shiogo, ta Honibarnü ketdangser kati ashi.
Dengue tashidak kanga züina akümba ajanga iba tashidak nungi kümzüka alitsü mechi nung Hombarnü nungi class VIII tashi teburtem tula teben talang den longpant aser tetsürtema tula teben talang den leggings mesüra stockings semang ta District Magistrate Raj Shekhar-i school tanurtem aser tsüraburtem dang shiogo.
Kaketshir tetsürtem class VIII tashi kurta tula teben talang aser teburtem tulaben talang den longpant asemtsü.
Onoki akokba tashi dengue tashidak tang aliba dang nungi tali prokshia modaktsütsü atema inyaker aser nüburtemi onok den tashi anga anidakba atema pelar, ta district magistrate Raj Shekhar-i IANS dang ashi.
School nung ketdangsertem danga school telungtet nung mokozü akahtsü shiogo.
Yimti nung taoba hopta tsüngda nung dengue agi shiranger parnok nisung 50 dak tema puteta lir. Iba tashidak yangi police ana dena nisung pezü tashi süogo.
Municipal pur danga iba tashidak nokdangba nung temulung agüja inyaktsü atema shiogo. Parnok dang jana intokba tesemtem merüka ayutsü aser kilentsütem nung tzü atsünga aliba repranga odaktsütsü shiogo. Ano mozükitem danga iba tashidak atema mozü peria ayutsü metetdaktsüogo.