~ Talitemjen Imchen.
LUKE SASONGI MEJEMBA KEN: –
TAJUNG KÜ LIMA AMA KONGA MALI
Ozü ki teraksa ka dang süaka,
Kodaker sentsü idakji yaloktsür.
Bendang lima nungi itaji penzüdang,
Kü lima ni menungraseter.
Tajung kü lima ama konga mali.
Ozü ki teraksa ka dang süaka,
Yipru mopungi teti onshiaka,
Tsüngsarusa nung jenokdak ki.
Tani tebelem anisüngzükdak.
Tajung kü lima ama konga mali.
Tanü ozü lima tammang tia nung liaka,
Anüng mepet tanak süir ama süitemtsü.
Tsüngremi ozü lima awapangangma.
Kodak tsünglulartemi teti nüka liangma.
Tajung kü lima ama konga mali.
Anojongi kinüngtsür süadokba ajanga Nokchanüken taküm nung tetsür asem tashi agitsüsa aküm. Mezüng kinüngtsüi tebur ana den jala ana aso. Tanabuba kinüngtsüi jabaso ana aso. Saka tasembuba kinüngtsüibo tanurji maso. Mezüng kinüngtsü Jakjemsüngla, tena kibong nungi mezüng chir Sasongdangba 1913 küm 9 Aug. anepdang züngia akümba mapang aso. Aser Guwahati Cotton College nung B.A renemtsü küm ka anünga lia, shirang tenzüker pei tasoyim Mangmetongi meyipa arur 1940 küm Sept. 10 anepdang ankongpang mapang asü.
KAKETREJU AZÜNGBA NUNGI TATSÜKA: –
1927 küm zünga (class) II nung, pai Mokokchung Division ajonga nung tematiba jenjang angu. Iba yongji sorkar nungi takoker tetoshi sen angutsüba tim liasü. Saka tesasatsüka pa melena tangar ka nemang iba tetoshi senji agüjaa aru. Iba sülen Impur nung 1928-1931 tashi azüng. Pa Impur nung azüngdang missionary aser tesayuri kanga ketasena anishi. Pai zünga (class VI) terok nung Naga Hills nungi ajak dang tematiba jenjang angu. Impur nung zünga terok tashi zünger külen Jorhat Christian School nung 1932-1935 tashi azüng. Idakji azüngba mapang, Laishiba nung osang tajung kaket zülur Luke taküm ama, pa yimyakoya aser jaklaliro nung achiteta American Missionarytemi Naroküm Luke jaloktsü. Iba sülen pa tenüng Sasongdangba melena LUKE SASONG aküm. 1936 küm matric nung first division nung takok anguba asoshi American Baptist Missioni tetoshi sen tatsük 5/- agüjaa aru. Iba sülen Guwahati Cotton College nung 1938 küm March tashi zünger “Intermediate Arts Second Class” nung takok angu. Iba sülen Serampore College, West Bengal nung azüngtsü bilem, saka teyarir aser senotsü peria mengutetba agi kasa college nung B.A azüngtsü tenzük. Saka tesasatsüka B.A renemtsü küm ka dang anünger lia, temang nung shirang tenzüka rejuji doktsü.
Pa zünga ter nung azüngba mapang Kolkata (Calcutta) University nungi “If I Were A King” ta ser ESSAY COMPETITION liasü. Iba tetoktepba nung Calcutta University ajonga nungi pai tajungtiba zülutet. Aser iba NÜNGO tatsük 10/- den Dogma ka agizük. Iba onük nung pai TETSÜR TASHI tongtipang ser zülu. Pa Chuba ka asünungbo “Tetsü kaji tanur asoba kol (birth machine) aser kidang amoktsüba dang masü, saka laia teburi inyaktetba mapa aika inyaktsü koka lir. Taji tetsüri kaket shisatsü bushitsü jenjang lapoktsütsü” ta densema zülusem.
Ano Assam ya West Bengal kübok District ka dang liasü. Aser Nagaland ya Naga Hills Assam District ta tenüng agütsür Sub divisiontem dang liasü. India limaji British nunger kübok aliba mapangka, Mokokchung S.D.O Lambert ta ser British nunger nisung tasen kati melen. Lambert ji kanga dang tesashi nisung ka liasü. Pa süia aodang kima yimdong merükmerüka atadaktsü. Kiset shiruru lenjang nung melidaktsü. Jara tapok nungi pa süiba reprangtsü tashi memelaba tulur ka liasü. 1935 küm kenü iba tulursangji Kübza süia Mangmetong ajanger aotsü osang yok. Iba mapang Luke Sasong jia Meyi sodi arushia yimtak ata. Pai temesüng nunger ama jakrepsü (suit) züp ta sobur, ankang ka nung techanu ka puoka bener Mangmetong nunger tebutedi denji amongi lenchii ao. Lambert ji kor nung mener Dobashitem den Kübza amongji süia Mangmetongi ayaokdang, “O tulur alii alung ni, onok na lenchii arua lir” ta ashi. Lambert ji tera ratabena kor nungi alu. Iba mapang pai ankang nung techanu ka bener alibaji, “Piak Piak” ta asaa tulur nemji nüngo agütsü. Tebuteditemji süngmangtepa alidang ano au tajem ka bener arur takyi lepteta tajemtsü süngo inoker, onok Naga marok nung süngo jemang ta shir agütsü. Mejemtetra tepangji takyi jagi ia jemang” ta ashi. Idakji Lambert süngoji mejemteti kanga süngmanga lir yimtaki tenaji langzütepa adok. Yim tonger külen tebutedi Purchibar kidang, Luke Sasong temesüng nunger mesüka sobubaji Lamberti machinüi langzütep.
Lambert : Sasongba, na kong alir?
Sasong : Ni Jorhat nung alir.
Lambert : Na yamai sobutsüsa aka na?
Sasong : Ni tashitemetet alang sobur ati’
Lambert : Mahatma Gandhi taküm reprangang. Pai yamai mesobur. Saka pei sobutsü dang agir.
Sasong : Jawaharlal Nehru taküm reprangang. Pai sen tatsük agi soruchioker aser England nunger ama sobur.
Lambert : Na ozü sobutsü agitsü shibai mela ?
Sosang : Ne tekolak nung alibaji China nunger korang masü no ?
Lambert : Ni talang agi asemer ati’
Sosang : Na korang asemtsü langa lira, nia talang lir ati. Kechiyong naa tazüngba matric, nia tazüngba matric nung koda? Na amaji chuba menden nung amentsü nia koka lir.
Lambert : Süra kü korang ya na semang’ ta shia semzüker agütsü.
Joko Sosangi korang agizüktsü teka oya lia, Dobashi Senkalemba (Longkhüm) aser tebutedi Mangla nati korangji rakzüker Lambart tekolak nungsa semoktsü.
TASÜTSÜ SHIRANG YIPTEN ALIDANG ZÜLUBA TATSÜ AGI: –
“Kodang shi timtem indang bilemdir, ken kenbo ya kechiba ta arur. Ano ken ken arishi anogo züngteta tempanga aruba bilemdang, Tsüngremer amsü nung ya tashi dang züngzüktsü no ta shisadanger. Timtem tushi liaka iba yagi asen tanela meremsepdaktsütsüla. Teti pelaa liang, kechiyong timtem ajanga nisungi Tsüngrem meim ji jangjaa achiteter.” “Ozü lima bendanger küpok shiruru tia nung aliba angudang, kü sempet, mapang aser taküm tenla ka Tsüngremi yok ta bilem aser kü dak aliba rangben agütsütsü mulungtet. Saka ano ozü lima mapang agi matong südi na’ Tsüngremi ozü nübur tammang tia nungi atsütettsü asoshi, memenui lanur kar dak kü mulungjang aser sempet mesüka apuokjangma.”
“Iba li nung asen timtem tushi ya majuru tashi taküm ka angatettsü makok. Tasüba ya nisungi ajangshia aotsüba süngküm ka aser ya angatettsü tasak. Saka shirsa Kibuba nung taküm ali, pa asoshi ibai joko taoksaba ka masü ta ni angateta arudagi.” “Iba liyim yabo amongi aruba mesüka lir. Saka ayong külenji teti alitsüba lima nung kü nük rangküta lir. Anungji iba lima nung adianu, medemsortem den pilayongbo merongjenli, ya akümlir wadang ka dang lir.” Amen.
Pa sür külen lepkhumong mapang, Wapong Longridangchetbai anir Ao Kaketshir tanishirtem arua ken ka, tang ABAM ken kaket 276 Lungjemba Moajang (Blest be the tie) tenloktsü aser pa leper nung yamai zülur yutsü.
HERE LIES MR. N. LUKE SASONG
A HERO WHO LED THE PEOPLE
WITH A HEROIC HEART AT THE
HISTORY OF OUR NATION.
1. Naga Students Leader 1932-35
2. Ao Students’ Conference President – 1938
3. A Freedom Fighter Against The Britishers
4. Active Leader In Christian Services.
Ao Kaketshir Mongdangi nüngtugu nisung nüngshi süa ayutsü mechi, Mokokchung Town nung lenmang ana shimteter pa aser Imnameren tenüng jaloktsü. Iba yongji tanü tashi Luke Sasong Road aser Imnameren Road ta tongtipang lenmang ana nung nüburtemi amshir.
“Luke Sasong shiranga alidang medemer aser metetteper tsüngtong arua mulungzürep lemsateper aser pa asüba osang angashir mangyim jashi lemsateper, Naga nungertem dang masü saka tsümartem aser temesüngtem nisung densema aika dang liasü. Saka item alima tenük lapoktsür nüngtugu nisungtemji tanübo asenok den melii, parnok taküm arishi jagi matateti, parnok medemer Luke Sasong amaji tipu talen bushia tasenogo.”
You must be logged in to post a comment Login