Lumiba ajanga tajangzük manguba agi inyakyim melenshir : Sharmila

Imphal, August 23 (Agencies) : Sepaitem nem tashi agütsüba ozüng agientsü atema pai küm aika lumia takhangba agütsü saka takok manguba ajanga lai la sentong melenshi ta Mongulbarnü Irom Sharmila-i ashi.
“Ni lumiba ajanga alizüng matong” ta tanü Chief Judicial Magistrate, Imphal West, L. Tonsing indang okadak nungi aludang Sharmila-i osangbener dang ashi.
Küm 16 tashi lumia lungkak aita aruba sülen August 9, 2016 nü Sharmila-i lumiba anen saka la pusemertem aikati la telemtetba magizük.
“National aser international jenjang nung ni pusemertem lir. Ni küm sentong maneni inyaktsü. Ni sentong metoktsü saka inyakyim dang melenshi” ta Sharmila-isa tanü ashi.
“Nübortem teyari medenra, kü indang sentong takok mangutsü. Inyakyim melenshitsüla aser ibaji atema election nung shilem agitsüla. Nisungtem külemi longjemer inyakra takok angutsü” ta lai ashi.
La New Delhi-i aotsü aser idakji North East Forum for International Solidarity (NEFIS) ajanga ayongzükba sentong ka nung adentsü, ta Sharmila-isa shisem.
“Ni Sharmila pusemer” ta tanü tezülubatem amer okadak kima nisungtem adenshi.
Sharmila-i Manipur nungi Armed Forces Special Powers Act (AFSPA) agientsü atema takhangba agüja lungkak aiter aser lai lumiba sentong anenba sülen nungi mozükidang liyonga arudar.