‘Lunar eclipse’ mapang nung tanur ka tenla agüja tepset

Hyderabad, Tsüklai 03 (Agencies): Tawa ‘lunar eclipse’ mapang nung Hyderabad nung külemküja dak sendakba nung tanur kinü ka tepseta tenla agütsüogo, ta osang ka ajanga metetdaktsü.
Hyderabad yimti kübok Chiluka Nagar kiyong nung aliba kilem kolak ka nung kinü tanur tekolak ka tangzüker indoka angu, aser iba dak sendakba nung police-i bushisüngdang tenzükogo.
Kasa para kidang alir tantsür ka anepdang sü aputsü atema kilemi atudang tanur ka meyong tekolak tangzüker alibaji lai angu, iba sülen lai kiyongertem nem iba osangji metetdaktsü.
Tanursangji arishi ita ana-asem shi liasü, ajisüaka shir tanur’ar tang tashi nungbo memetet.
Iba dak sendakba nung tantsülar jala kinüngbu, taxi driver Rajasekhar asüngdangyatsü atema pua lir.
Police meyong azütemi police temji ki kati anir tua jana indokba pongdang tashi anir aoba sülen ki kibur, Narahari aser par jabaso Ranjith nata police-i pua lir.
Osang angazükba agi, Narahari aser par jabaso na jagi mapang shia külemküja dak sendakba balala inyaker.
Tanur tekolak anguba kilem nungji azübo maliasü, aser ibaji ajanga tanursangji tanga nung tepsetba sülen tekolakji kilem nung toktsü südi, ta bilemer.
Iba dak alia police-isa tanur temangjia bushidar.