Lung agi ona rara anenba sülen ang olemtep tenzüktsü: Amit Shah

New Delhi, May 28 (Agencies): Lung agi ona raraba inyakyim anenba sülen ang Kashmir tebilemtsü indang olemtepji tenzüktsü ta BJP president Amit Shah-i ashi.
Taoba NDA sorkari Hurriyat den olemtep aliba ama, tang aliba Centre sorkaria inyaktsü asü koda ta osangbeneri asüngdangdang, “Ozüng alema mapa inyaksangshiba anenba sülen ang olemtep tenzükteter. Onoki ajak den jembitsü” ta pai langzü.
BJP aser PDP nati Jammu & Kashmir nung sorkar mekümtetdang tamasa telok ana tsüngda Agenda of Alliance agitepba nung state nung sendaktepa alir ajak den olemtep agitsü indang lateta lir.
“Lung agi ona rara anenba sülen ang onoki olemtep tenzüktsü. Lung agi aon tashi, olemtep malitsü. Parnoki lung agi onra, onoki parnok nem naro magütsütettsü. Parnoki ibaji angatettsüla” ta Shah-isa metetdaktsü.
State sorkari mapa inyakba nung tenük asünger asü koda ta osangbenerisa BJP president dang asüngdangdang, sorkari infrastructure renloktsü atema mapa tajung inyaka aruogo aser yimtsüng tia nung aliba tesemtem nung renlokdaktsüogo, ta paisa shisem.