Lungkak aitertemi Manipur assembly telungi aitsü merang

Imphal, September 5 (Agencies) : Hombarnü Imphal nung lungkak aiter kari Manipur assembly telungi tashiyim agi aitsü merang saka police aser paramilitary sepaitemi parnok nokdang.
Manipur Assembly monsoon session nung tanü tatembangba anogo liasü aser lungkak aitertemi assembly telungi atutsü merangdang nisung aika yiru.
Sepaitemi tenük amadaktsüba mokozü amshitsüsa aküm aser iba mapang nisungtem yiru aser tain anabo mozükidangi anir oa anepalu ta osang angazüker.
Bharatiya Janata Party (BJP) aser Joint Committee on Inner Line Permit System (JCILPS) nati sangdong balala ajanga assembly telungi aitsüba sentong atongba metetdakja liasü.
Iba nung ajemdaker Deobar ayaterm nungi Imphal West aser Imphal East district nung district magistrate temi assembly anasa kilometer 1 telongtet nung curfew alitsü ozüng agütsü aser Manipur assembly nung aser temeket nung sepaitem mapa lemzüktsü.
Manipur nung JCILPS-i ILP bill yanglutsü akhanger aser BJP-i police constables shimba maparen athitsü atema takhangba agütsür.
Tanü BJP state unit president, Khetrimayum Bhabananda-i anir party züngsem kari assembly telungi aitsü merang aser ano telok kati tanga tsütsülen nungi aitsü merang. Iba mapang ano tanga telok kati ‘ochimashi Congress sorkar’ ta yimyim ayima tesem tangalen nungi assembly telungi aitsü merang. Ajisüaka, parnok ajak police aser sapaitemi nokdang.