Luroi/August ita atema Kohima DPDB senden ayonga amen

Kohima, Luroi/August 18 (TYO): Luroi/August ita atema Kohima District Planning and Development Board senden DC’s Conference Hall, Kohima nung Luroi 18, 2018 nü menogo, ta ketdangsertem osang ka ajanga metetdaktsü.
Youth Resources & Sports Advisor aser Chairman DPDB Kohima, Er. Zhale Neikha leniba nung iba senden amen, aser senden nung MLA, Keneizhakho Nakhro-a densema liasü.
DPDB Chairman-i züngsem ajak senden nung pelaa agizük aser iba senden nung züngsem aika adenba atema pelaba lemsatep. Paisa district ajungtsü aser renloktsü atema o lemteptsü asoshi taruba senden nunga ajak medema adentsü imlar, ta metetdaktsü.
Kohima DC aser Vice Chairman DPDB, Rajesh Soundararajan, IAS leniba nung taoba senden nung lemtetba onüktem reprangshia liasü.
Kohima district kübok constituency ajak nung Local Area Development Programme Scheme 2018-2019 onük dak sendakba nung Board züngsemtemi o lemtep, aser sorkar nem agutsütsü atema agizüka liasü.
Senden nungsa Adoption Committee balala nungi Conveners aser züngsemtemi peipei ‘adopted villages & wards’ dak sendakba osang agutsü aser iba mapang nung DC-i Committee ajak dang mapa balala tekaraba nung inyaktsü metetdaktsü.
Tawa tzünglu maneni aruba dak sendakba nung DC-i, tawa tzünglu kanga aruba ajanga Kohima district kanga mejungi kongshia ki aika raksa aser kibong aika prokshitsüsa akum, talisa Dimapur aser Kohima na tsüngda lenmang khenyongi raksaba den KMC jana indokba tesem nung anentsüh alu, ta metetdaktsü.
Ajisüaka itemji yanglushitsü atema tim departments-i inyakba atema DC-i pelaba lemsatepba den külemi maneni pei mapa tajung inyaktsü aser lendong balala atema renema alitsü ajungshi.
Luroi/August 1, 2018 nungi Incident Response System (IRS) benoka lir, ta shia DC-i DDMA züngsem aser tim department ajak dang renema alitsüla aser IRS inyakyim nung aliba ama pei teinyaktsü shilem inyaktsüla, ta ashi.
Department-i inyakba osangtem metetdaktsüdang Joint Director aser PD -ATMA, District Agriculture Office, Kohima, Vizonyu Liezie-i Rashtriya Krishi Vikas Yojana (RKVY) aser Paramparagat Krishi Vikas Yojna (PKVY) kübok tang teinyakdak mapatem, Agri department kübok tongti schemes, National E-Governance Plan (NeGP-A), Pradhan Mantri Krishi Sinchayee Yojna (PMKSY) aser National Adaptation Fund for Climate Change (NAFCC) kübok mapa balala inyakba metetdakja liasü.