Luyong, Tuli nung Weavers Service Centre semzükogo

August 09, 2017 nü Luyong, Tuli nung Industries & Commerce, NIDC Parliamentary Secretary, Amenba Yaden-i Weavers Service Centre semzüktsüba noksa nung angur. 

Luyong (Mokokchung), August 10 (TYO): Development Commissioner of Handlooms, Ministry of Textiles, Govt. of India kübok August 09, 2017 nü Luyong, Tuli nung Industries & Commerce, NIDC Parliamentary Secretary, Amenba Yaden-i Weavers Service Centre (WSC) semzüktsüogo.
Iba sentong nung jembidang Amenba-i, WSC ya tesem nung rongsenkettsüng ajungkettsütsü atema Department of Industries & Commerce-i nükjidong yur inyakba entrepreneurial infrastructure ka lir, ta metetdaktsü.
Paisa, ano maneni tang aliba Centre den common Facility Centre la lapoksemtsü, ta metetdaktsü.
Amenba-i, tanü Nagaland nung mapa manguba tebilemtsü ya tayongzüka tulu ka lir; sorkar mapa nung joko maongka mali, ibayongji state sorkari lanurtemi peisasa mapa balala inyaktsü atema maongka balala agütsütsüsa kümogo, ta metetdaktsü.
Nagaland Pulp & Paper Company asentenshia melapoktetba atema tesasaba olen ka nung Amenba-i, iba unit asentenshitsü ya joko pungmang ka ama kümogo, ta ashi.
Paisa, topography den külemi loktiliba-sobaliba ajanga project tulu tenzüktsü memelar. “Local entrepreneur temi medium aser micro enterprises tenzüktsü atema inyaktsüla, item amaji junga ketdangsütettsü aser alima tzümopung nunga timtem magütsütsü,” ta metetdaktsü.
Weavers Service Centre dak sendakba nung Nagaland Handloom & Handicraft Development Corporation Managing Director aser Industries & Commerce, Nagaland additional Director, K. Hokishe Assumi-i, Centre-i agütsüba iba ama service centre ya tang mezüng state nung lapoker, ta metetdaktsü.
Iba centre ya ajanga local artisans nem lenla asem- designing, dying aser weaving nung training agütsütsü, ta paisa shisem.
Paisa, training agirtem nem sen 27,000 jenjang hadir aser equipments agütsütsü aser ibaji unit shia nung subsidized rate sen 1300 agi angutsü, ta metetdaktsü.
Iba centre amenoktsü atema aliji Luyong village nungi aser taoba mapang NEZCC Director, Lipokmar Tzudir-i tenla agüja liasü.
Iba sentong nungsa Deputy Director, WCS, Government of India, Subramaniam-i training agirtem nem training osettem lemja liasü.