Luyong Valley Festival 2017 tembangogo

Luyong Valley Festival tatembangbuba aonung Taoba chief secretary, Alemtemshi Jamir aser 2016 solo competition adokla, Linuknaro nati nüngtugu ‘Kidangmonger’ ken atenba noksa nung angur.

Dimapur, December 22 (TYO): 2buba Luyong Valley Festival 2017 Hokulbarnü takok nung tembangogo. Iba benjongmung tembangba sentong nung tongti tesemdanger ya taoba Nagaland Chief Secretary, Alemtemshi Jamir IAS liasü.
‘Reinvigorating Lives’ omen nung ajemdaker anogo ana amongba benjong nung saisapong aser tetoktepba balala nung Tuli temeket nungi lanurtem arua shilem agiba den külemi district administration, political party balala aser kidanger state, Assam nungia raliwalirtem arua iba benjongmong mera ketdakja mungogo.
Iba benjongmung tatem sentong nung jembiba mapang, iba ama benjong ajanga tarutsü nung terenlok alitsü teimla sayuba den külemi Luyong-i iba benjongmong reprangtsü asoshi raliwalir tali arutsü imlar, ta retired Chief Secretary, Alemtemshi Jamir-i ashi.
Iba sentong nung kijai atenba ken tetoktepba agia liasü, aser lanurtemi shilem tajung agiba ngua, tongti tesemdangeri tenüng asangba den külemi Naga nunger lanurtem dak ken atentsü sempet tajung lir, aser tarutsü nung lanurtem asoshi nükla tajung angur, ta ashi.
Alemtemshi Jamir ya tawa political party tasen tentetba, NDPP nung working president lir, aser pai iba sentong nung jembidang, par party ya tarutsü lanurtem asoshi aser terenlok atema tentet, ta ashi.
“Asenoki temelenshi aginür. Naga nungertemi temelenshi aginür…Onoki sorkar tajung bener arunür,” ta leniri ashi.
2buba Luyong Valley Festival 2017 tetoktepba balala nung takok angurtem:
1. Beach Volleyball:
Winner: Bendangsunep & Toshienba (Tzudikong Ward)
Runners-up: Imsuwar & Bendangjundba (Tzudikong Ward)
2. Open Arm Wrestling:
1st prize: Imkongsungküm Tzudir
2nd prize: Padangshi Jamir
3. Tug-of-war
1st prize: Team Thug (Tuli)
2nd prize: Rongpangzulu and group (Luyong)
4. Marathon Race:
(Tetsür) – 1st prize: Imlibenla
2nd prize: Imnasenla
(Tebur) – 1st prize: Taliyanger
2nd prize: Takatemjen
5. Master Chef:
1st prize: Yatila Jamir
2nd prize: Akumienla