M Karunanidhi, DMK lennir ser küm 50 jungogo

New Delhi, Chiteni 27 (Agencies): Temang mejungi liaka M Karunanidhi ya Dravida Munnetra Kazhagam (DMK) tir ka ama inyaka arur Rogonü küm 50 jungogo. Par jabaso aser iba party indang working president M K Stalin-i Twitter nung tebu ya anokshitsü makokba tashi, ta ashi.
“Aseni teti meima aliba asen lennir ya yimten yimsüsüba (DMK tekolakba ama) nung century tesadang ka anokshitsü makokba tashi ka ama lia aruogo aser tetsükdaktsü agi takokba kümdaktsü…#Kalaignar50,” ta Stalin-i Tamil oshi nung zülutsü.
DMK party tenzüksang aser taoba Chief Minister Annadurai asüba sülen iba party nung Karunanidhi ya tekolakba ser aru, saka pa temang manemba agi mapang talangka yimjak nung mangur. Taoba hopta pa ya Kauvery Hospital-i anir ao.
Iba hospital ajanga Yangtepnü osang ka sangdongba nung, Karunanidhi temang tera tamajungba akümer, ta shia lir. All India Anna Dravida Munnetra Kazhagam (AIADMK) lennir aser Kamal Haasan nungertemi Karunanidhi indang osang metettsü atema par ki semdanga liasü.
Ato Kilonser Narendra Modi-ia Twitter nung DMK tekolakba tekeraba nung taneptsü ngudakjang, ta zülutsü.
“Thiru @mkstalin aser Kanimozhi Ji den jembiogo. Kalaignar Karunanidhi indang asüngdangogo aser nüngdakba nung yaritsü shiogo. Pa tekeraba nung taneptsü angutsü atema sarasademtsür,” ta Modi-i Twitter nung zülutsü.
Andhra Pradesh Chief Minister N Chandrababu Naidu-ia Karunanidhi’er ki semdanga pa temang jenjang asüngdangya süogo. Anogo ishika tejaklen tangola sashiba nung yaritsü mechi Karunanidhi indang tracheostomy tube melentsü.
Stalin-i ashiba agi, tebu ya nüburtem tenzükba mapa nung küm 80 liasü, entertainment industry nung küm 70 aser legislature nung küm 75 liasü. Mozüki ajanga pa temang tera tamajungba akümer, ta shiaka Stalin-ibo, “Pa shirangba asoshi kecha shisabulutsü mali,” ta ashi.