M. Venkaiah Naidu-i NIT Dimapur semdang

May 23, 2018 nü NIT Dimapur nung India Tatong Tir M. Venkaiah Naidu-i kaketshir ka nem kulikaket agütsüdang agiba noksa angur. 

Dimapur, Monupii (May) 23 (TYO): Nagaland ya sobaliba nung takar state ka lir aser National Institute of Technology (NIT) lapokba ajanga Nagaland tongtipang akümba sayur ta tanü Tatong Tir M. Venkaiah Naidu-i ashi.
Dimapur nung NIT 2 buba Convocation sentong nung o jembidang Naidu-i “Kaketshirtemi kaket shisatsü aser technical skill tem angazükbaji pei wadang nung inyaka aodang tongshi ama asütsü, saka life skills angazükba ajanga New India yangerba nung teyari agütsütsü” ta ashi.
Degree anguba mesüra mapa anguba ajanga education metembanger saka angazükba ya taküm piyong inyaka aoba maparen ka lir, ta paisa ashi.
NIT Nagaland ya linük asoshi tongtipang technical Institute ka lir aser iba ajanga Nagaland nung industrial tsütsü teyari agütsütsü imlar. NIT Nagaland ajanga industry tem lapoktsü aser India kübok tangalen nungi corporate sector aser technocrat tem Nagaland-i arutsü imlar, ta Naidu-isa ashi.
North-East tesem nung ali rongsen talubosa lir saka senzüsenbongtsü tasak aser nisungtem meta talanglang pilar alir. Iba tesem nung connectivity majung aser infrastructure peria mali. Anungji, North East renloktsü atema connectivity tajungba kümdaktsütsüla aser ibaji ajanga tourism, business aser people-to-people contact ajungkettsü, ta paisa ashi.
Sentong nungsa Tatong Tir Naidu-i graduates nem certificates aser gold medalist angur nem medals lema agütsü.
Nagaland Governor, P.B Acharya-ia o jembidang taküm nung degree ka angubaji alizüng tongtetba masü saka iba ajanga talila angazüktsü atema tetenzüker südaktsütsüla, ta ashi.
Sentong nung Director, NIT, Dr. S Venugopal-i institute indang osang tatsü agi metetdaktsü.