Macedonia-i Greece arrtsülen atsü atsür

Gevgelija, November 28 (Agencies): Pei linük toktsür Europe nung jenoka alitsü apusortemi Greece ajangdanga par linüki aitbaren nokdangtsü nükjidong nung Macedonia-i Greece arrtsülen atsü atsüdangtsü tenzükogo.
Tanü nungi tenzüka atsüba atsüji kobika atsütsü iba osang mejangjateti lir saka Macedonia mitkartemi Macedonia kübok Gevgelija border crossing anasa feet 8 talang atsü atsütsü tenzükba osang jangjaogo.
Greece arrtsülen atsü atsütsü tenzükba osangji shitak ta Macedonia mitkar lenir katia osang jangjashitsü saka iba atsü den sentakba osang tangbo pai memetetdaktsü.
Kiralongrartemi tawa Paris yimti nung lendong atalokdaktsüba sülen Greece tsütsülen nungi aruba migrant nisungtem nokdangtsü nükjidong nung Greece arrtsülen atsü atsüngdangtsü sentong renemba osang ka Macedonia sorkari anogo ishika tejaklen metetdakja liasü.
Greece ajangda Macedonia linüki aitsü merangba migrant nisung 200 shi yinzü agi yangluba atsü ajemdanga Macedeonia-i tan Brehostibar nü aitsü merangba osanga jangjaogo.