Machine dak temulung malemer

Tawa Uttar Pradesh election nung BJP teloki takok tulu angubaji yimten telok aika asoshi meimlaba takok liasü, ibayongji parnoki Electronic Voting Machine (EVM) aitsü. Atangji, electronic machine ya nisungi yangluba oset ka dang asünungji nisungi pei mulungbalen atsünga inyakdaktsütsü asoshi machine nung electronic inyakyimji mashi ka nung sayangtsütsüa akok. Tatishitsü agi, tanü asüngbo shishilembadak seret aotsü atema electronic machine dang amshir, anungji tayokeri tajangzük talila aginüdang seret aoba electronic machineji telonglen tera perepketa toktsütsüa akok, iba jagi oset agi seretbo matu saka seret nung aliba meter agibo seret atua sayutsü. Iba amaji nisungi yangluba oset agi nisungtem ashioktsütsü koka lir. Itemji teyanglurtemi dang metet. Atangji, angatettsü atema tatishitsü amshir dang ashi, dokan nung seret aoba electronic machine o vote agütsüba electronic machine najibo teyangludangyongi nüngdak meteta yanglur asünungji kenyongi balala asütsü. Aji oda, yimten telok aikati EVM meshitaki amshi asütsü ta aijaka, Election Commission of India-i parnoki amshiba EVM nung shingaia pei mulungba result angutsüsa kecha meinyaktettsü, ibaji tamakoktsü lir ta ajangajanga metetdakja aruogo. Ajisüaka, AAP, NCP aser CPI (M) ama yimten teloktemi EVM mashi amshiogo ta kanga sashia nokdak nungji, Election Commission-i parnok dang EVM-ji komakaser mashi amshitettsü ibaji sayutsü atema anogo atakzüktsü, ajisüaka iba anogo nung yimten telok shinga maru. Iba jagi Election Commission-i metetdaktsüba toang shitaka ta metenogo. Iba denji ano EVM nung temeyong agi nemer vote enoktsüba dang masü saka iba kasaji paper nung ajenzüker adoktsü. Atangji, yimten telok shirnoki EVM dak temulung malemer, parnoka tamakok marem EVM aitsürba masü saka temulung malemtsüsa tulu liasü, kechiyong election mapangbo pei telok nungsa nübo teimba amato züngdangtetter saka vote azüngdangbo tangar teimba angur. Ibaji shitakba EVM tai asü mesüra nisung mulungjang tai asütsü (?) ta bilemdangtsü kanga nüngdaker. Asen lima ama sensaker teimba aliba lima ka nung, yimten temeten junga mangtetter atemabo, amtsük telong kajia tsüngrem amai lir. Ibayongji angateta liaka karibo timtem marem pei temeten yokdoker. Iba ama tia nung alirtemi, ashiko, mapang tonger senotsü mejimenuka nung tejak aser temulung melentsüa akok. Iba ama jagi sensakertem teti sensaka dang alir. Tanü item tia nungi nüji akümtsübaji asenok asoshi kanga rongdak nüngdak kümogo. Atangji, vote enoktsüba yimya ya miima dang enoktsür asünungji shibai shiba nem enoktsüar memeteter, iba jagi vote mazüng tashibo shiba adoktsüar memeteter. Aji oda, kodang meimlaba nisung ka adokdir nisungtemi machine dak temulung malemtsübaji tim dang lir. Ajisüaka, joko tanü putu yimya agi mapa ajak electronics agi dang inyaktsüsa yangluteta aka nungji electronics inyakyim toktsür akhi ama ballot paper nung teben agi nema vote agütsütsübaji putu tensa den mapet akümer. Ibaji gari anena yutsür tetsüng agi jajar amai asütsü. EVM amshia election agiba yagi election nung tim masüba inyakyim inyaktsü aliba maparen aika nokdanger aser ano vote azüngtsü asoshi kanga temela kümogo. Aji oda, tamalen shisemba ama nisungi dang yanglur asünungji Election Commission-ia ano maneni EVM amshiba ajanga nisungi temulung malem masütsüsa tali tajungba aser takangba inyaka aotsüla. Tangbo asenoki EVM indang jembir saka memenui EVM-a mamshii kidang mena yur kinunger ajunga internet ajanga dang online nung vote agütsütsü mapanga arutsü. Iba amaji alima aiendang asenoka tangatetba nung aientsüla aser yimten nung tangateter ka ama tebok aser tanü asoshi dang bilema masü saka tarutsü anogotem asoshi bilema shilem agitsüla. Tangbo asenoki EVM dak dang temulung malemer saka iba dang nungi shisabolutsü tulutibajibo asenoki asenok dak shingaia temulung melemtettsüsa aliba taküm ya asütsü.