Madagascar nung wara agi nisung 124 taküm samatsü

Antananarivo, October 25 (Agencies): August ita wara tesashi tenzükba sülen Madagascar asetkong nung aluba yimti tuluba ana nung kongshia nisung 124 süogo, ta ketdangser osang ajanga ashi.
Madagascar nung wara ya kanga bulua lir aser August ita nungi iba wara agi kongshir nisung 1,192 jungogo aser tamalen aruba dang nungi taküm tekeraba arua yimtsüngtem nung masü saka jila nung mezüng kongshiogo, ta ashir.
Iba wara ya yimra amai temang aronger, süksena aiter, temang angor, mangmanger, saktsür aser temang shilem balala awaker.
Alima nung wara tesashi tabu asem lir: bubonic, septicemic aser pneumonic. Saka iba asetkong nung shirangertem asemsü nung shilem ana ya pneumonic agi shiranger,
Pneumonic wara ya tamajungba lir aser iba wara ya Madagascar nung adoka lir. Iba tashidang wara ya kanga mela menateper aser nisung ka aketba agi nisung ka dak menaloker. Iba tashidak ya menar ghonda 24 tsüngta anepalu mesüra asütsü kanga melar lir.
Bubonic tashidak ya azübong mesüra iba ama mesükba shiruru tila ajanga nisung ka nungi ka nem menaloktsür tepokpok nung kongshir. Bubonic tashidang agi atonger shilem 10 bo pneumonic kümdaktsür.
Septicemic tashidak ya temang nung azü jajaba tezü ajanga menar. Iba wara ya merila aser iba ama azü ajemba shiruru tilatemi medakba mezüra zübu ajanga bacteria ya nisung ka temangi ayier.
“Taoba mapang küm ka nung shirangba dang shilem asem agi taküm timba shiranger,” ta National Office for Risk & Disaster Management ajanga Bodhbarnü agütsüba osang nung shia lir.
Iba asetkong nung item wara agi asür 94 jungogo, ta taoba hopta World Health Organization ajanga sangdonga liasü.
India Ocean nung aliba iba asetkong yimtiba Antananarivo aser Toamanasina ya Madagascar nung yimti tuluba ana lir aser asetkong nung iba wara agi tonga alirtem shilem 55 bo iba yimti ana nung lir.
Iba tashidak wara ajanga medical staff 54 dak kongshiogo.
Iba tashidak koktettsü asoshi sen million $9.5 nungdaker, saka tang tashi nung sen million $3 dang bendena lir, ta kasa osang ajanga ashi.