Madagascar nungi athlete 88 China nung training agitsü

Antananarivo, March 11 (Agencies) : Madagascar nungi athlete 88 tashi China nung ita pungu training agitsü Madagascar sports minister-i metetdaktsü.
“Saisapong balala pungu asoshi Madagascar nunger nisung 88 tashi China nungi mongintem aser Madagascar nungi technician temi shimteter taküm ita pungu China nung oa training agitsü,” ta Hokolbarnü Madagascar sports minister, Anicet Andriamosarisoa-i China nunger ambassador Yang Xiaorong den memorandum of understanding (MOU) ka nung sign asüba mapang ashiba osangbenertemi metetdaktsü.
“Item asayartem ya tzü awartem, athele balala asayartem, ping pong asayartem, weightlifting aser badminton asayatem lir,” ta minister-i ashi.
“China sorkari Madagascar nung nüngdakba asadanga bushitsü asoshi nisung pezü agi akümba ‘study mission’ ka yok aser ibaji ajanga saisapong tsütsü amalitepa inyaktsü kümtet,” ta paisa ashi.
Anicet-i, iba tesendaktep ajanga tzü awaba, athele balala asayartem, ping pong asayaba, weightlifting aser badminton asayatem ang masü saka ano tanga saisapong nunga temelenshi adoktsü, ta ashi.
Yang-i, linük ana senteper Madagascar-i China nungi saisapong coach tem yoka yangji saisapong sempet tajung keta alirtem China-i anir oa training agidaktsütsü aser asayadang nüngdakba osettem agütsütsü lemtet, ta ashi.