Madhur Bhandarkar-i Fashion film tatongtep yanglutsü

Mongputeni/October 30, 2018 (Agencies): Fashion film koba ajanga Priyanka Chopra indang acting career melenshitsü, iba film yanglur küm 10 Tentonü abensaogo.
Iba film yanglur küm 10 abensaogo saka Madhur Bhandarkar-i ano iba film otsü meshimai lir. Film yangluri 2008 küm sayaba film tatongtep tang teyangludak lir.
“Kü ket nung Fashion 2 film tangoktsü atema concept bo lir. Kü mulung nung otsü ishika lir. Ni teti film ya taküm nung tajangshiba dak ajemdaker yanglur aser lokti den apet film yanglutsü meranger. Anungji tanga kasaji inyaktsü. Ajisüaka film otsü tangang tetenzüklen lir aser mapang tatsükabo agitsü,” ta pai Hindustan Times dang ashi.
Pai, Bar, Page 3, Corporate, Heroine aser Calendar Girls nunger amala yangluaka Bhandarkar-i tang mezüngbuba sequel ka yanglutsü asoshi merangdangdar. “Tatongtep film ka yanglutsü ni kodanga jangraa mebilem. Ni film kaji takok nung dang tembangdaktsüner. Ni film ka tatongtep yanglutsü nüngdakba kodanga majitet,” ta pai ashi.
“Fashion dak sendakba nung ni alima dak sendakba otsü tem bilemdanga arudar. Iba flm ya mezüngbo ghonda 3 ser minute 10 talang liasü saka ghonda 2 ser minute 35 kümdaktsü. Anungji ano otsü aika ashitsü anunga lir,” ta pai shisem.
Film nung tongti shilem agirtem tenüng sanga Bhandarkar-i ashiba agi, “actor ajaki film nung shilem tajung agiogo aser imlaba dang nungi alia parnoki shilem agi. Priyanka, Kangana aser Mugdha nungeri shilem tajung agiba ajanga ajak süngmangdaktsür. Iba film sayar küm 10 jungogo aser ni film nung tatalokba tem ajak bilemteter.”