Madhya Pradesh CM-i lumai longkak ait tenzükogo

New Delhi, June 10 (Agencies): Madhya Pradesh nung aluyimertem longkak aitba mapang nung tanü Madhya Pradesh Chief Minister, Shivraj Singh Chouhan-i Dussehra Maidan nung lumia yimjung atema takhangba agüja mapang telatet ka makai longkak ait tenzükogo.
Ajisüaka opposition party, Congress-ibo iba ya “saya” ka dang lir, ta aitsü.
Aluyimer tentettemi alu nung parnoki züsentetba chiyungtsü/aonsotsütem nung jenjang tajungba agütsütsü aser parnoki sen apua aliba atoktsü densema takhangba balala agütsüdar.
Tanü 11:00 ako meta Chouhan-i Bharat Heavy Electricals Limited indang Dussehra Maiden nung mener longkak ait tenzük.
State Congress tongti otongdar, K K Mishra-i, Chouhan-i nüburtem dang, pai lumibaji saya ka asü, sentong ka asü mesüra state nung lendong adokdaktsüba atema tatok meshir?, ibaji metetdaktsütsüla, ta ashi.
“Pai Gandhi yimya benshir, ajisüaka yamaji masü. Pai Gandhi kürakyanglu tsüngdang mamen, mesüra pai iba saya metenzükdang kürakyanglu nem narozük mazüktsü,” ta Mishra-i ashi.
“Küm shia Dussehra Maidan nung Ravana rongdoker ta pai metettsüla,” ta paisa ashi.
Tawa Mandsaur district nung aluyimertem longkak aitdang police-i injang khaloktsüba ajanga aluyimer pongu asüba sülen anüdoklen Madhya Pradesh nunga aluyimertem longkak aitba prokshi, aser iba atema state sorkar aitsüba mapang ka nung Chief Minister-i yimjung atema takhangba agüja lumia longkak ait tenzükogo.
Yashi Chauhan-i, “Ni Mantralaya (secretariat) nung aliba kü office nung mamentsü, saka Dussehra Maidan nung mener yang nungjagi mapa ajak inyaktsü,” ta metetdakja liasü.