Madhya Pradesh nung Aamir Khan indang film Dangal tax-free kümdaktsüogo

Bhopal, January 21(Agencies): Madhya Pradesh nung Aamir Khan-i shilem agiba film ‘Dangal’ tax-free asütsü sangdongogo.
Iba film kanga junga takok ngua aoba ajanga state nung melangtepba asaya ajungkettsü asoshi academy ka lapoktsü ta state government-i sangdongogo.
Iba osang anaprongla tanü Chief Minister Shivraj Singh-i sangoktsü.
“Melangtepba nung ajemdaker yangluba film koba nung Aamir Khan adok, iba film ya MP nung tax-free kümdaktsütsü government-i lemtetogo,” ta Mahavir Singh Phogat aser pa kinungtsü na yasüng iba film reprangba sülen pai tweet asü.
Ano maneni danga tweet ka nung pai yamai zülusem; “Melangtepba asaya ajungkettsü asoshi MP nung academy ka lapoktsü.”
MP nung film tax-free kümdaktsüba rongnung Dangal ya pezübuba film lir.
2014 August nungi tenzüker tang tashi nung tax free kümdaktsüba film temji, “Jai Gangaajal”, “Neerja” aser “Mardaani” film tem lir.