Madhya Pradesh nung Congress-i paper ballot amshitsü akhanger

Bhopal, March 14 (Agencies) : Taruba ita by-elections agitsü aliba nung electronic voting machines (EVMs) masü saka paper ballot amshitsüla ta tanü Madhya Pradesh Congress unit-i takhangba agütsüogo.
“Vote agütsürtemi temulung melemi bilemer. Anungji, Ater aser Bandhavgarh Assembly mendentem atema by-elections nung paper ballot dang amshitsüla” ta MP state Congress president, Arun Yadav-i osangbener dang ashi.
Uttar Pradesh elections nung EVMs tim mesüi amshi ta BSP tanishir Mayawati-i aitsüba ama paia temulung melemi bilemer ta Arun Yadav-isa ashi.
“State nung aser Centre nung BJP sorkari by-elections nunga kasa inyakyim amshitsü ta bilemer. Elections agitsü aliba tesemtem nung Congress pusemer aika lir anungji onoki by-elections anaprong nung takok angutsü” ta paisa shisem.
Tawa state pungu nung Assembly elections indang osang atema mepelar, kechiyong state pungu nungi asem nungbo Congress-i menden teimba angu, ta Yadav-isa metetdaktsü.
“Goa aser Manipur nung sorkar akümtsü atema Congress mejaok aser iba ya temzüng alema inyakba ka lir” ta paisa ashi.
Tanü Congress teshimtet telok kati Madhya Pradesh nung Chief Electoral Officer nem April 9 nü agitsü aliba by-elections nung ballot paper dang amshitsü atema tezüluba ka nung takhangba agütsü.
Assembly nung taoba Opposition lennir Congress MLA Satyadev Katare asüba ajanga Ater nung election agitsüsa aküm.
Ano, Bandhavgarh menden nungi MLA aser state minister Gyan Singh-i yaküm November ita Lok Sabha election nung takok anguba sülen iba menden tazüng aküm.