Madhya Pradesh nung kaketshir 12 soseta asü

Bhopal, May 13 (Agencies): Hokolbarnü Madhya Pradesh nung Class 10 aser Class 12 tatidang indang results sangdongba sülen, ghonda ishika tsüngda kaketshir 12 tashi soseta asü.
Tasürtem rongnung adianu ana liasü aser parnok 10 bo Class 12 kaketshirtem liasü.
Bhopal nung Naman Kabde-i tetsü indang syringe ka auya aser idakji mim enoker pa sasa atu. Osang angazükba agi, Kabde tetsüji nurse ka lir aser pai 90% ngunüa liasü saka pai 74% dang ngutebayong soseta asü.
Ano, Satna district nung arishi küm 18 tain Rashmi aser tenu Deependra nati tena Class 12 o Class 10 tatidangtem nung tamakok anguba osang angazükba sülen soseta asü.
Jabalpur nunga Class 12 nung tetsür kaketshir ka marks junga mongutetba agi tejashi nung lai la sasa train jakdang jokoka menüngsetdaktsü.
Results osang metetdaktsüba sülen kaketshirtemi Madhya Pradesh Board of Secondary Education indang Helpline number tem nung parnok tejashi aser khurettem lemsateptsü tenzük.
Hokolbarnü Class 10 aser 12 tatidangtem indang results sangdongba nung tetsürtemi takok tajungba angu.