Madhya Pradesh nung police-i aluyimer 5 khaset

Bhopal, June 6 (Agencies): Mongulbarnü Madhya Pradesh kübok Mandsaur nung police-i lungkak aitertem dang injang khaloktsüdang aluyimer 5 khaset.
Anogo trok tashi aluyimertemi loan agütsüba meyipa magitsü aser parnoki tsünüsenbongtetba atema jenjang shitak atakzükjang ta takhangba agüja arur.
Tanü tatalokba atema bushisüngdang ka asütsü tuyuogo.
Lungkak aitba ajanga Mandsaur, Ratlam aser Ujjain nung internet service shibangogo aser külen Rashtriya Kisaan Mazdoor Sangh-i Bodbarnü state ajunga mokdangtsü ayongzükogo.
Mongulbarnü, Madhya Pradesh CM Shivraj Singh Chouhan-i tasür kibong shia nem sen lakh 5 teyari agütsütsü ta sangdongogo. Ajisüaka, Shivraj Singh-i Congress dak tai tongloktsü aser pai ashiba agi, “timi dang agia aliba sentong nungi ozüng alema inyaktsüsa Congress-i ajungmeso.”
“Ozü sorkari aluyimertem atema aika inyaktsüogo. Onoki parnoki takhangbatem aika langzükogo. Congress teloki tasa atonga ozüng alema mapa inyakdaktsü” ta paisa metetdaktsü.
Congress tatong tir Rahul Gandhi-i Twitter nung, “iba sorkar yagi asen linük nung aluyimertem anema rarar. BJP’er new India nung aluyimertemi temeten meshidang injang agi langzür” ta ashi.
Hombarnü MP Chief Minister-i ashiba agi, “iba sorkar ya aluyimertem indang sorkar lir. Aluyimertem indang tebilemtsütem atema nüngdakba mapa ajak inyakdar.”
“Tsünüsenbongtsütem minimum support price (MSP) nung alizüktsü atema Rs 1,000 crore stabilisation fund ka tenzüktsü” ta paisa shisem.
Paisa aluyimertem dang, “MSP nung aliba ama piyas seret nung sen 8 agi alizüker aser onoki Indore, Ujjain o Mandsaur district tem nung piyas alir aser ibaji June 30 tashi aotsü.”
Chief Minister Chouhan-i Deobarnü aluyimertem den ajurutepa senden amenba sülen aluyimer telok anati lungkak aitba sentong athi saka tanüngba teloktemi maneni lungkak aiter.