Madhya Pradesh nung tzümetsüng ajanga nisung 11 süogo

Bhopal, July 09 (Agencies): Madhya Pradesh nung tzünglu maneni sashia aruba ajanga tesüiba anogo ana tsüngda state nung tajemba agi nisung 11 süogo aser Satna District nung army temi tang tashi nung nisung 400 dak tema yaritepa aienshidaktsüogo.
“Tesüiba anogo asem-pezü state nung tzünglu sashia aruba ajanga nisng ti süogo,” ta Honibarnü Madhya Pradesh Chief Minister, Shivraj Singh Chouhan-i Bhopal  nung osangbenertem dang metetdaktsü.
Bhopal nung nisung ana süogo aser Tikamgarh, Rewa, Jhabua, Betul, Raisen den Panna shia nungi nisung kaka asü, ta pai ashi.
“Ano tanü nikongdang nisung ka asüba osang angazükogo. Arishi küm 21 Sourabh Katiyar motorcycle nung aoba mapang Shahpur awatsüng anasa kilentzü agi ponger ao. Pa tasümang ngutetogo,” ta police ketdangser kati ashi.
Yashi Mandla aser Singrauli districts nunga nisung kaka asü aser parnoka tzümetsüng agi ponger ao.
CM-i ashiba agi, Hoshangabad nung Narmada ayong lendongbang nung yimdar.
“Timtem nung alirtemi teyari atema 1079 nung call asütsü akok. Ketdangsertem dang tekaraba nung yariteptsü atema tuyuogo,” ta paisa ashi.
Chouhan-i par cabinet züngsemtem den senden ayonga aliba thinenogo aser pai minister tem dang peipei district-i tsüngdong oa tensa repranga timtemertem yariang, ta tuyuogo.
Bhopal-i chiyungtsütem taseptsü nung yokogo. Timtem nung yariteptsü atema yangji NDRF team lir, ta paisa ashi.
Satna district nungi timtem ajangshia alir nisung 400 relief camp temi yokogo, iba den külemi Tamas, Sone aser Mandakini ayongtem nung tzümetsüng ajanga kongshir nisung 300 shi nem teyari agütsütsü atema district administration-i achaayangdar, ta Public Relation department ketdangser kati metetdaktsü.