Madhya Pradesh:Tzünglu aser tzümetsüng agi nisung 15 asü

Bhopal, August 20 (Agencies) : Madhya Pradesh nung Hokolbarnü nungi tzünglu maneni aluba ajanga tzümetsüng adoka tang tashi nung nisung 15 süogo aser Sagar o Satna district tem nungbo ki dena chirpogo, ta Honibarnü ketdangsertemi ashi.
State nung ketdangsertemi lendong nung yariteptsü atema Army teyari aser iba den külemi tzümetsüng agi amshir aliba nüburtem kümzüktsü atema helicopter meshiogo.
Sagar district nung Rahatgarh kübok Baniyani Ghat tesem nung tzünglu manendangi aluba ajanga ki chirptsüdang teka agi oset yanglur kibong ka nungibo parnok nisung tenet tashi asü aser asem kanga mejungi yirur lir, ta police-i ashi.
Iba ki chirpdang Manu Rani (arishi küm 55), Vikas (arishi küm 18), Vipin (arishi küm 13), Sanjana (arishi küm 10), Kallu (arishi küm 30), Sarla (arishi küm 25) aser arishi küm ka ser ita trok tanur Tamanna nunger asü.
Teyirur asemprongji tang mozü kidang yaridar.
Satna district kübok Maihar jila nung tawa ang asemben atongtepa asüba ki tasen ka kisürtema dena Honibarnü chirpdang nisung aika nembang, ta police-i ashi.
Iba ki chirp dang nembanger parnok nisung pezübo agitetogo; ano nisung aika nembanga alitsü amai temulung melemi bilemer anungji itemji kümzüktsü atema kanga meranga inyaktepdar, ta police-isa ashi.
Iba ki ya state sorkar indang agency, Madhya Pradesh Housing Board-i asüba lir.
Chief Minister Shivraj Singh Chouhan-i osangbenertem den ajurutepa tzünglu aser tzümetsüng ajanga bentsür aruba lendong indang jembia liasü aser idangji pai, Satna nung relief operation mapa tenzükogo, ta osang tejangja angütsü.
Satna, Rewa, Panna aser tanga district tem nung lendong agi kongshir aliba nüburtem kümzüktsü atema operation tenzükogo, ta Chouhan-i ashi.
Tzümetsüng agi kongshir alirtem jenokdaktsütsü atema sorkar-i relief camps-a yanglutsüogo, ta paisa ashi.