Madonna Billboard 2016 Woman Of The Year shimogo

October 17, 2016: Madonna 2016 küm atema Billboard ”Woman of the Year’ shimogo.
Pop ken atenla nem iba sempet ya December 9, 2016 nü New York City nung amungtsü aliba 11buba annual Billboard Women In Music sentong nung agütsütsü. Iba sentong ya munger anogo asemnü sülen Lifetime channel nung sayutsü.
“Madonna ya super artist rongnung, la kentem ajanga densema lir,” ta The Hollywood Reporter-Billboard Media Group nung Tir aser chief creative officer, Janice Min-i sangdong ka nung ashi.
“Lai purapitetba, maneni tebilemba tasen bena arutetba aser sensakertem bendanga agüja meimba ajanga alima nung nisung million aika ajungmesor. Iba den külemi lai tetsürtem temeden atema kanga bendanga agüja inyaker aser la ajanga tetsür yongtsü nung sensaksem melenshidaktsüba dang masü saka asen temeden ajak den saku ta angatetdaktsür,” ta lai shisem.
Arishi küm 58 tain, Madonna ya taküm küm talangbaka ‘Rebel Heart Tour’ jaja-a liasü aser iba nungji ticker million ka dak tema yokteta sen million dollar 170 aatetogo.
Billboard-i, “Billboard Boxscore otsü nung tetsür kija kentena jajar rongnung Madonna-i sen timba aatetogo. Lai tang tashi nung kentena jajaba nungi sen billion dollar 1.31 aateta lir,” ta metetdaktsü.
Ano tetsür indang kensep timba ayokba rongnung Madonna shingaia memeneper. Lai kensep tajungtiba ti ben nguogo aser Billboard 200 chart nung kensep tajungtiba 10 rongnunga 21 ben tashi denogo. Billboard Hot 100 nunga top 10 nung 38 ben tashi densemba ajanga lai otsü tasen yanglua lir.