Madonna-i Donald Trump’er jabaso merenshi

London, September 03, 2016 : Arishi küm 58 tain, Madonna-i 2012 küm Zimbabwe nung Trump’er jabasotem shikaridang tepsetba morok keyi ka ajunger tangokba noksa ka instagram nung inoktsü aser lai, “Ni Trump nem masü saka Hillary Clinton nem kü vote agütsü kuliji ibaia ka lir,” ta ashi.
Lai, “Na jangra atemtsü atema iba ama akhüm taket shiruru tepsettsüsa nenok kechi balaka,” ta ashi.
Madonna-i Africa nung sensakertem atema teyari agütsüi orr arüba sülen iba noksa Instagram nung inoktsü. Lai Africa nung Kenya First Lady, Margaret Kenyatta den ajurutepa tanur aser tetsü asüba ajema kümdaktsütsü atema olemtep ka aka.
‘Ray of Light’ ken atenla, Madonna-i la indang Instagram account nung Margaret tena külemi tangokba noksa ka lemsatepogo aser iba noksa teküpolen lai, “Kenya nung tetushi tetsür, Margaret den ajurutep. Margareta-i tenzükba ‘Beyond Zero Campaign’ sentong angatettsü merang aser linük nung tanur aser tetsü asüba ajema kümdaktsüba den tetsür temeten angatetdakja parnok nem tashi agütsüba inyakyim ajungkettsü atema jembi,” ta zülu.
Tanur pezü tetsü, Madonna-i Africa nung slam tulutiba Kibera-a semdanga parnok okronga aliba alima nem metetdaktsü.
Madonna-isa jana agi sünga aliba ayong ka indang noksa tangoker Instagram nung inoktsü aser iba noksa teküpoklen, “Nür tzü tajemtsü iba ayong nungi agir ka asünunga koma bilemtsü!! Kibera nung iba tia melentsütsü atema inyakdar,” ta zülua lir.