Madonna-i la indang biopic direct süner

Rongchii/April 05 (Agencies): Nüngtugu kentener Madonna-i la indang taküm otsü nung ajemdaker film ka direct sünüa bilemba lemsatepogo. Mezüngbo, lai la indang biopic dak sendakba nung maparentem thitsü, saka osangtem ajanga angazükba agi, la taküm otsü tejangja aser tajungtiba ashitsüji lai dang akoktsü ta ashi.
Taoba mapang Elyse Hollander-i züluba script ‘Blond Ambition’ as a ”disease in our society”, koba la (Madonna) taküm otsü indang ka Queen of Pop Madonna-i lemsatepogo aser iba mapang Elyse-i ashiba agi, Madonna taküm otsüji shingaia masü saka lai (Madonna) ang tajungtiba shitettsü.
”Kü taküm nung ni metetta ajangshibatem shingaia memetet. Kü taküm otsüji ni dang shitettsü. Kü dak atalokba ashitsü merangertemji tiyazü jembir aser tamashi o jembir asütsü. Iba ama ya lokti atema timtem lir,” ta Instagram ajanga Madonna-i lemsatep.
Iba project atema producer Michael De Luca aser Universal Pictures na longjema asayameyanga liasü, ajisüaka arishi küm 60 tain Madonna-i la kentenba wadang nung ajemoker külen nungi lai mejema atenba ken tem iba project nung amshitsü atema rights magütsü.
Tang, Madonna-i, la music industry nung ajemoker sülen alima sabang nung la nüngtugu akümba indang otsü yanglutsü mulungtetogo, ta Daily Mail sangdong ajanga metetdaktsü.
Madonna-i director maparen inyaktsü mulungtetba ya tan mezüng masü, 2018 küm ‘Like A Prayer’ ken atenla Madonna-i Michaela DePrince indang biopic ka ‘Taking Flight’ ta nüngja agütsür direct süa liasü.
2008 küm comedy film ‘Filth and Wisdom’ aser 2011 küm sayaba ‘W.E.’ sülen yaküm ‘Taking Flight’ film densema lai direct asüba film asembuba asütsü.
‘Hung Up’ ken atenla, Madonna-isa ‘I Am Because We Are’ documentary zülua aser produce süa liasü.