Madonna-i Paris lendong nung asürtem nem tetushi agütsü

 November 16, 2015: Paris nung lendong ataloka nisung aika taküm laluba ajanga U2 aser Foo Fighters telok dena kentener telok aikati sentong ati, ajisüaka Madonna-i Honibarnü Stockholm nung sentong odang agia liasü. Lai kechiba iba sentong mati’ar ibaji rasaa ashiba mapang la sabang nung nüktzü alua ajeb.

Madonna-i, ni iba sentong atitsü khen bilema aru ajisüaka jungjunga bilemdangba sülen mati, ta ashi.

“Kechiba parnoki mulungba ataloktsütsü? Parnok nem kodaser kü sentong songtemdaktsütsü? Asen temeten kodaser parnok nem alena yudaktsütsü?” ta lai nüktzü agi ananger ashiba mapang nisung meyirjang aika sendena alirtemi ajemajema anga liasü.

“Tangar aika pei meimertem taküm lalur jebtepa aliba mapang ni sabang nung tsüngsanga pelateptsü ya temulung agibo menangzükteter,” ta lai ashi.

“Parnoki asenok mepeladaktsüner. Asenok ajemajema lidaktsüner. Ajisüka telungjem nung takok lir aser alima nung lendong aser liralongrar mapa jenti atalokaka alima nung tajunga lir, aser asenok iba tajungji sayutsü asoshi yangi sendena lir,” ta laisa ashi.

Iba sülen lai sentepa alir ajak mapang tatsüka süngjema mokremer asürtem nem akhümtsübu agütsütsü ayongzük. Akhümtsübu agütsür külen lai, box guitar kija tema “Like a Prayer” ken tenzük aser tesülen tanga music dena atemtsü tenzük.

Sentong temer külen Madonna-i, ammang aliba tesawa kümdaktsü amai ni bilemer, ta Facebook nung lemsatepa liasü.