Madonna, Johansson, Ashley nungertemi Trump aitsür

Washington, January 22 (Agencies): Republican telok nungi US Tir, Donald Trump-i tetsürtem, Mexico nunger aser Muslim tem anema jembiba asoshi America nüburtem aser alima nung aliba tetsürtem aika jashidaktsüba ajanga Trump sempar aika kümdaki.
Trump-i tetsür-tebur lemsaba aser iba mesükba ken-o jembiba anema nisung meyirjang aika Washington DC nung adenshia Trump anema ola adokba ‘Women’s March’ sentong ka agir.
Trump-i jembiba aija nisung meyirjang aika Pink sentsü agi mejiba korang semer Washington nung White House aser National Mall temeket nung adenshi.
New York, Los Angeles, Chicago aser Boston yimtitem nunga tetsür meyirjang aika adenshia Donald Trump anema ola adoka jaja.
Alima ajunga nung Trump dang tejashi sayutsü asoshi adenshiba ya nisung million pezü dak tali alitsü, ta iba sentong ayongertemi metetdaktsü.
Iba Women’s March sentong nung shilem agitsü sentepba nisungtem ya, Trump US Tir akümnü sentepba dang khenyongi teimba liasü.
USA nunga nüngtugu nisung, Scarlett Johansson aser Emma Watson nungertem densema iba sentong nung shilem agi.
“Ni nü nem vote magütsü saka na US Tir ta ni akhümtsübur, saka ni nü po masemdang nai kü po semangma,” ta Scarlette Johansson-i sabang nungi Tir Donald Trump dang ashi.
Amy Schumer, America Ferrera aser Janelle Monae nungeri shilem agiba Women’s March nung Madonna, Ashley Judd aser Alicia Keys nungertemi o jembi aser ken aten.
US Tir atema Donald Trump den toktepla, Hillary Clinton shibai Hokolbarnü Tir menden melenba sentong nung arua aden, lai-a Women’s March nung shilem agirtem dang pelaba osang Twitter ajanga lemsatep.
Priyanka Chopra-ia ‘Women’s March’ posemer
US Tir, Donald Trump anema agiba ‘Women’s March’ sentong posemer, ta Priyanka Chopra-ia metetdaktsü.
“Women’s March nung shilem agir kü adianutsür aser adianutem dang kanga pelar. Nia kanga jashir. Tetsürchanu temeim aser tetsürtem temetenji nisung temeten lir,” ta Priyanka-i Twitter nung zülu.
Dwayne Johnson, Zack Efron aser Alexandra Daddario nunger den külemi shilem agiba “Baywatch” yangluba maparen maneni tenzüktsü asoshi Priyanka Chopra Los Angeles nung lir.