Madrid Open: World No 1, Murray tsükogo, Djokovic semi-final-i iogo

Madrid, May 12 (Agencies): Madrid Open tasembuba round nung World No. 1, Andy Murray aser Borna Coric asayaba nung Coric-i 6-3, 6-3 agi Murray tsükdaktsü.
Britain nunger Murray-i mezüng set nung mejungi asayatet aser iba kasa yimya nung tatem tashi asaya.
Arishi küm 20 tain aser World No. 59, Coric-i taoba ita Marrakech nung Grand Prix Hassan II akokba ya pa asoshi ATP mezüg akoker liasü aser pai break point ana tashi agiteta Madrid Open anaben tashi bena alisang, Murray madak takok angu.
Murray ya tekettsü yirur aliba tajungba kümer mezüng tournament Monte Carlo Masters taoba ita asayadang ‘last-16’ nungi tsük aser iba sülen Barcelona Open asayaba nung Dominic Thiem-i semi-final nung tsükdaktsü.
Andy Murray-i taoba küm Rome Masters marok bena lir aser taruba hopta iba marok tanaben pai ayutsü asoshi asayatsü aser iba sülen French Open asayatsü lir.
Hokulbarnü Novak Djokovic aser Kei Nishikori tsüngta quarter-final asayatsüba liasü saka Kei Nishikori teben yirur aliba ajanga ball kata mezüki Japan nungbai iba asaya nung shilem magitettsüsa aküm aser Djokovic semi-final-i ai.
World No. 8, Nishikori ya yirur aliba ajanga taoba ita Barcelona Open nunga masayatet. French Open masayadang Rome Masters asayatsü lir saka iba tournament nung Nishikori shilem agitsü ano mejangjateti lir.
“Rome Masters asayatsü merangtsü saka tangbo nangzüka matatettsü,” ta Nishikori-i ashi.
Djokovic-i Deobarnü semi-final nung Rafael Nadal mesüra Belgium nunger David Goffin den asayatsü.
Madrid Open tetsürtem asaya nung taoba küm takok ngua alila, Simona Halep küm pezü nung iba asayamong indang final-i asembenbuba iogo. Lai semi-final nung Latvia tsür, Anastasija Sevastova madak 6-2, 6-3 agi takok angu.
Taoba hopta ana tejaklen Halep-i Worlde No. 22, Sevastova madak takok ngua liasü.
Halep ya tetsürtem double nung Irina-Camelia Begu den külemi semi-final nung ia lir.
Lai Honibarnü final nung France tsür Kristina Mladenovic mesüra Svetlana Kuznetsova den final asayatsü.
Russia tsür Kuznetsova-i quarter nung Bouchard madak 6-4, 6-0 agi takok angu.