MAFA Tournament 2017 MVYO-i kokogo

Dimapur, October 6 (TYO): MAFA Tournament 2017 final nung Medziphema Village Youth Organisation aser Medziphema Town Youth Organisation na tanü temaba jenjang atema Medziphema Local Ground nung toktepogo. Tzünglu aruba ajanga asayaba moapu kanga ajujia aküm, saka iba ajanga asayartem asayatsüba tanela meremsepdaktsüi kanga meranga asayaogo.
Asaya tenzüker telok anapronglai goal idaktsütsüba asoshi maongka nguteta liasü saka telok kati danga goal magütsütet, saka minute 25 or MVYO nungi asayar Kevitsobei-i mezüngbuba goal agütsü. Ajisüaka minute 29buba nung MTYO pur asayar Nisalhoulie-i goal ka agüja score kasa aküm.
Asaya kanga toktepa asayaa aruba sülen minute 75buba nung MVYO nungi asayar Khriese Terhüja-i par telok atema tanabuba goal idakja parnoki iba asaya akok.
Asayamung tembangba sentong nung Medziphema Village Council, Chairman, Nikhonyü Kuotsu-i tetushi tesemdanger ama arua iba sentong nung aden. Pai temolung ajak agi, MAFA 2017 asayamung ayongzükba committee tenüng asang. Pai maneni Medziphema Area Football Association (MAFA) lenir tasentem nem tenüngsang agütsü. MAFA mendenpurtemji; Lamkai Kholhou- tir, Kepe Nakhro-General Secretary, Metseilhoukho Kuotsu-senyur aser Jonathan-Adviser. Kuotsu-i ano lanurtem dang pei tejangraba nung bendanga aütsütsüa azüoka asayaba ajanga jenjang temaba tongtettsü asoshi ajungshi.
Kija senpet angurtem rongnung Best goal keeper – Neichübilie Vüprü (MVYO), Best defender – Lhangammarch Sithlou(KYSU), Highest scorer – Kikrukhrielie Kuotsu (MTYO) aser Player of the Tournament – Mesevituo Terhüja (MTYO). Asayamung akoker MVYO pur nem sen den külemi marok aser kuli kaket agüja liasü.