MAG teloki Kohima nung science azüngertem dang len sayu

Kohima, May 11 (TYO) : Kaketshirtem dang parnok züngzüker külen inyaktsü asoshi nükjidong tejangja yur lenmang meteta azüngtsü asoshi len sayuba telok ka tenüng agi ‘My Admission Guidance’ ( a unit of Satwat Edu. Service Pvt Ltd) teloki yaria yangi Kohima nung Ura Academy Hall nung Class XII nung science azüngertem dang “Name Your Career,” ta asüba omen nung amendaker shisalen sayuba sentong tajung ka liogo.
Iba sentong nung nung School Education & SCERT nung Principal Secretary, F. P. Solo tongti tesemdanger liasü. Pai jembidang, Nagaland nung kaketshisatsü angazük tenzükdakyongi jungjunga sayutsüla aser talisa Maths aser Science angazüktsü tenzükba tamendakdakji jungjunga yanglutsütsüla ta metetdaktsü.
Tang tashi nung arts azüngertem dang nungi science azüngertemang mapa temelaba angur, ajisüaka Nagaland nung Naga nunger kaketshirtem class 10 ajangteter külen 80% bo Arts azünger. Ajisüaka, Manipur nungbo kaketshirtem rongnung teimbakati science azünger, ibayongji Manipur nung technical mapa inyakertem agi manünger ta Solo-isa metetdaktsü.
Aji oda, kodang taküm nung mapa inyaktsü asoshi lenmang ka shimtetdir, tanü tensa nung nübortem nüngdakba apia shimtettsüla ta paisa ashi.
Iba sentong nung Dr. Er. Vikuotuolie Angami, Ph.D tetushi tejaoker liasü.
Iba sentong nung Pradip Sengupta (Founder of XL education, IIT & MNNIT) aser N.A Harish (Founder of CEG Education) natia jembia liasü.
Iba sentong ayonger tenüng nung Wt.Abeni-i jembidang, My Admission Guidance telok ya Nagaland aser Northeast nung aliba kaketshirtem yaritsü asoshi tentetba telok ka lir. Iba telok yagi kaketshirtem class 10 aser 12 ajanger külen kechi azüng nung tajungba asütsü ta asüba tebilemtsütem nung shisalemsatepa len sayur ta metetdaktsü.
Alima nung teinyaktsü mapa jenti lir, saka item wadangtemji mangu aser memetetba agi lanurtem aika mapa mangu kazüdoker ta lai sasaba olen ka mettedaktsü.
Taoba küm 5 tashi “My Admission Guidance” telok ajanga kaketshirtem dang tim len sayua yaritepdagi ta laisa ashi.
Tanü sentong nung tebilemtsü agi sünger alidang kati ka ajungshitepa tarutsü anogotem tajung asoshi bilema inyaktsüba indang shisalemsatepa liasü. Iba sentong nungsa medical, engineering, management, paramedical & tanga courses azüngtsüba lenmangtem indang shisalemsatep.