Maggi menunoi angu tenzüktsü: Narayanan

New Delhi, August 01 (Agencies): Switzerland nung yanglutetba chiyungtsü rongnung tetsüti Nestle, US sen billion 97.5 alangba company meyong kongsang, India nung managing director tasenba Suresh Narayanan-i, kanga nüngtugu ‘instant noodle’ Maggi ya memunoi market nung angu tenzüktsü aser iba den külemi company-i tanga maparena kar tenzüktsü, ta Honibar nü ashi.
Arishi küm 55, Narayanan ya, Nestle India nung taoba mapang managing director Etienne Benet, shiba July 25 nü mapa doktsü, pa melena July 31 nü shimogo.
Narayanan-i ashiba agi, dairy, chocolate aser tanang aketba chiyutsütem nung temulung agütsüba ajanga terenlok tali adokdaktsütsüsa inyaktsü.
Ajisüaka Maggi noodles shibangba otsü nung pai kecha odia melangzü.
Pai, “Maggi tanaben market-i bener arutsübaji tongtibangba teinyaktsü lir. Tang tashi nungbo ano telemtetba kecha magi. Ajak atemaji telemtetba tajung ka nüngdaker. Ataa alitsüba dak alaka kecha mali,” ta pai ashi.
“Maggi inyakyimji maneni aotsü aser iba den külemi tanga maparena ajak tenzüktsü,” ta paisa ashi.
Narayanan-i ashiba agi, taküm nung pai tensa tamajung aser tasak aika ajangshiogo aser tan ajuruba yaa item rongnungji ka lir.
Bombay High Court-i Maggi shibangba ken o nung telemtetba ka Hombar nü metetdaktsütsü.
Maggi nung lead aser monosodium glutamate (MSG) tera tali inoksema yangluba agi meyoki anena atatsü asoshi India nung food regulator ketdangsertemi June 5 nü metetdaktsü. Iba sülen Nestle-i parnoki yanglua aliba Maggi ajak mayok anenba mapang iba chiyungtsü nung kecha lendong mali ta shia liasü.
Kasa mapang India nungi tanga linük yokba Maggi chiyungtsü tem temang asoshi kecha timtem maliasü ta kuli ngutetogo. Item linüktemji Britain, Singapore aser Canada linüktem lir.
2014 küm Nestle India nung chiyungtsü terenem aser chiyungtsü yangluyim shia aliba Maggi ya noklang nung shilem 31.5 yoka liasü. Kasa küm mamatzü agi yangluba chiyungtsütem shilem 47.1, chocolate aser chiyungtsü tangatem shilem 12.2 aser beverages tem shilem 9.2 yokteta liasü.