Magufuli-i Tanzania Tir tasenba akümtsü tenangzükba agiogo

Tanzania yimtiba, Dar es Salaam kübok Uhuru Stadium nung Tanzania yimsüsür, John Magufuli (Abelen)-i Tanzania Tir tasenba inyaktsü tenangzükba agiba noksa nung angur. (Dar es Salaam, November 06)

Da r es Salaam, November 06 (Agencies): Tanzania yimsüsür, John Magufuli-i Tanzania Tir tasenba akümtsü tenangzükba yashi Brehostibar nü agiogo.
Taoba October ita 25 nü agiba election nung takok anguba osang nung tashishi ketaka, Magufuli-i Tir inyaktsü tenangzükbaji yashi Tanzania yimtiba, Dar es Salaam kübok Uhuru Stadium nung agia liasü.
Kasa sentong nung Tanzania indang mezüngbuba tetsür Tatong Tir, Samia Suluhu Hassan-ia shilem agiba osang jangjaogo.
“Ni, John Pombe Joseph Magufuli-i United Republic of Tanzania indang Tir ama nungloktsüba mapa aser khuret ajunga ochishia aser bendanga agüja abentsü nangzüker,” ta Magufuli-i par Swahili oshi nung yashi nangzük.
“Raratepba lendong kecha mataloki election sentong takokba nung tembangogo aser ibaji ajanga asenok ajaki takok anguba kuli tejangja sayur. Tsüngrem leniba kübok asen nüburtemi amalitepa külemi lungjemer inyakba ajanga asen linük arentsü,” ta pai metetdaktsü.
Yashi sentong nung Zambia Tir, Edgar Lungu; Rwanda Tir, Paul Kagame; South Africa Tir, Zacob Zuma aser Zimbabwe Tir, Robert Mugabe nunger densema, Africa nung tentetba linük lenirtemi shilem agia liasü.
Africa linük lenirtemi yashi agiba Tir inyaktsü tenangzükba agiba sentong nung shilem agiba ajanga Africa sorkartem rong nung tesendaktep tajung aliba kulia angur.
Ajisüaka, “Election sentong ochishia magi,” ta shia, opposition teloki yashi agiba sentong nung shilem magi süidaktsüogo.
Taoba Tir, Jakaya Kikwet melenzüka Tanzania Tir menden benoksang, Magufuli ya par Tanzania linüki Britain yimli nungi 1961 küm nüchiso anguba sülen tanü tashi nung Tir 5 buba akümer lir.
Taoba October ita agiba election nung arishi küm 56 tain Magufuli-i vote noklang shilem nung shilem 58 tashi ngua vote shilem 40 shi angusang, Edward Lowassa madak takok ngua Tir menden abentsü jenjang angu.