Maharashtra Angh-i Memon temepishiba magizük

Mumbai, July 29 (Agencies): 1993 küm Mumbai nung bomb aika pokdakja amakba ken o nung aibelensang, Yakub Memon-i pa dang taochi sayutsü asoshi Maharashtra Angh C Vidyasagar Rao dang mepishia liasü saka tanü Angh-i iba temepishibaji India temzüng Arrla 161 kübok magizük.
“Temzüng Arrla 161 kübok Yakub Memon temepishibaji Angh-i magizük,” ta tanü Raj Bhavan otongdar kati sangdong ka ajanga metetdaktsü.
Arrla 161 kübok aibelener ka nem tatok agütsütsü, temerenshi agütsütsü atema mapang atsülangtsü mesüra sota atatsü tashiji State Angh nem agüja lir.
July 21 nü Supreme Court-i Memon temepishiba magizükba sülen ghonda ishika tsüngda pai Angh nem temepishiba ka agüja liasü.
Taküm April ita nung TADA court-i July 30 nü Nagpur Central Jail nung Memon alenseta südaktsütsü asoshi anogo lateta liasü.
Memon-i pa südaktsütsü anogoji thinena atatsü asoshi mepishiba nung Supreme Court bench ka nung züngsem ana obang mapuba yong yashi Supreme Court-i züngsem asemi akümba bench ka tenteta liasü.
1993 küm March 12 nü, iba mapang nungji Bombay ta ajaba yimti nung bomb 12 tashi atonga pokdaktsü, aser iba lendong nung nisung 257 asü aser nisung 700 dak tema yirua liasü.