Maharashtra chief minister aser dy. CM na mapa nungi anenogo

Devendra Fadnavis-i Maharashtra nung anogo asemnü chief minister inyakba sülen Governor Bhagat Singh Koshyari nem pai CM menden yutsüba shidi agütsüdang agiba noksa angur. (Mumbai, November 26).

Mumbai, Yimpoksüi/November 26 (Agencies): Nationalist Congress Party (NCP) lenir aser deputy CM Ajit Pawar mapa nungi anenba sülen Mongolbarnü Devendra Fadnavis-i Maharashtra chief minister menden toktsüogo.
“Iba sülen (press conference) ni Raj Bhavan-i aotsü aser resignation agütsütsü. Shirnoki sorkar kümtetdir parnoki tajungtiba nung inyakyonga aotsü imlaja atar. Ajisüaka sorkar tashi maittsü kechiyong tebilemdangba aika lir,” ta Fadnavis-i osang benertem den sensaksemba mapang ashi.
Fadnavis-i Honibarnü pa indang deputy Ajit Pawar den Maharashtra chief minister mapa tanabenbuba abentsü atema tenangzüktepba agi. Iba jenjang agiba ajanga nisung aika aoksadaktsüogo aser Shiv Sena, NCP aser Congress alliance-i, Angh Bhagat Singh Koshyari-i sorkar kümtettsü saoshi Fadnavis jaokba anema Supreme Court dangi ken o abentsü asoshi telemtetba agi.
Pai ashiba agi, NCP lenir Ajit Pawar-i BJP den longjemtsü asoshi telemtetba agiba süen BJP puri sorkar kümtettsü asoshi temeden meshi. “Ajit Pawar-i par party nungi MLA 54 pronglai sorkar nongita yaritsü asoshi telemtetba agiba shiti ka agütsüba sülen sorkar kümtet,” ta Fadnavis-i ashi.
NCP lenirtemi Ajit Pawar tanaben meyipa anir arutsü meranga aliba mapang ka nung pa mapa nungi anen. “Ajit Pawar-i tanep kü den ajurutep aser alliance nung shilem megitettsü ta shia mapa nungi anen. Pa mapa nungi anenba ajanga onok majority mesüi kümogo. NCP pur ajak arua adentsü ta bilemba agi onoki sorkar kümtettsü asoshi telemtetba agi,” ta Fadnavis-i ashi.
Mongolbarnü anepdang Supreme Court-i obendang agütsüba nung Fadnavis lenisüba kübok kümtetba sorkar ya Bodhbarnü floor test agitsü, ta ashi.
SC ajanga ashiba agi, vote agütsüba inyakyim ya temporary speaker kati achaayangtsü aser live telecast asütsüla. Vote tem ya secret ballot inyakyim nung magütsütsü.
“Floor test agitsü menoadokra ochi mashi inyakyim telungi aitsü ana nung lir. Democratic inyakyim tem kümzüka ayutsü asoshi okadak atema tenüngdaktsü kümogo. Tang amala tensa ka nungbo floor test agitsü ya tajungtiba asütsü,” ta okadak ajanga metedaktsü.