Maharashtra CM den Union minister temi Anna Hazare ajuru

Ralegan Siddhi, February 05 (Agencies): Centre nung Lokpal aser state tem nung Lokayuktas amenoktsü atema tang lumia longkak aitsang, social activist, Anna Hazare temang atema bilemja tanü Maharashtra Chief Minister, Devendra Fadnavis den Union Minister anati pa ajurua pa dang lumiba anentsü mepishiogo.
Arishi küm 81, Hazare-i sorkar nem iba takhangba agüja January 30 anogo nungi tenzüka lumia longkak aitdar, aser tesüiba anogo tenet nung pa temang touzük seret 4.30 ajemogo.
Tanü nikongdang Fadnavis-i Ahmednagar district kübok Hazare’er yim, Ralegan Siddhi atongba sülen pa ajurua liasü. Pa den Union Ministers- Radha Mohan Singh, Subhash Bhamre aser Maharashtra Minister Girish Mahajan nungera liasü.
Hombarnü Hazare-i, taoba mapang pai Lokpal akhangdang pa nungiter BJP lenirtemi election nung takok anguba sülenbo iba takhangba atema mebilemer; Union sorkari nüburtem ashioktsüogo, ta ashi.
“Arun Jaitley aser Sushma Swaraj ama lenirtemi mapang ka nungbo Parliament nung Lokpal atema takhangba aguja liasü, ajisüaka sorkar tashi anguba sülenbo parnoki ola madoker. Parnoki Lokpal aser Lokayukta sempar ama ni reprangteter. Lokpal atema longkak aitba ajanga parnoki election nung takok angu saka tangbo parnoki ibaji amadokogo,” ta ashi.
Yashi MNS tongti, Raj Thackeray aser Water conservationist, Rajendra Singh natia Hazare ajurua pai longkak aitbaji pusemer, ta lemsatep.
Ajisüaka Thackeray-i pa dang, tamagitsü sorkar ka atema nai nü taküm tenla magutsütsüla, ta ashi.