Maharashtra Congress-i election atema party tem lokteptsü lemtet

Mumbai, Aami/June 09 (Agencies): Tanü Maharashtra Congress Tir, Ashok Chavan-i 2019 küm Lok Sabha election aser state assembly election nung BJP anema tangatetba kasa aliba secular party tem lokteptsü atema ayongzükogo.
Yimtenren tensa asadangba senden ka amenba mapang nung party-i state nung tanga party tem den lokteper election nung toktepttsü atema lemtet, ta pai metetdaktsü.
“Iba ama teloktep ajanga BJP anemertem vote melemsatsü atema onoki inyakner. Party Tir, Rahul Gandhi-i taruba hopta semdangba mapang nung onoki pa nem iba telemtetbaji metetdaktsütsü,” ta Chavan-isa ashi.
Pai ashiba agi, tawa Palghar Lok Sabha election nung party pongui toktep, saka secular party tem vote lemsaba ajanga BJP-i takok angu.
Chavan-isa, lokteptsüji state nung tanga party tem- Samajwadi Party, Bahujan Samaj Party, Republican Party of India factions, Communist Party of India (M) aser Nationalist Congress Party tem dak keta lir, ta ashi.
BJP den teloktep party, Shiv Sena aser Maharashtra Navnirman Sena na iba teloktep nung adentsü asü? ta asüngdangba langzüdang Chavan-i, party tangatetba nung ajemdaker parnok den lokteptsüji tamakoktsü, ta ashi.
Maoist-i Ato kilonser, Narendra Modi aser Chief Minister Devendra Fadnavis na taküm agitsü asalentong yanglu ta tai tongloktsüba onük nung Chavan-i, Centre aser state sorkari sangdong agutsür, ta metetdaktsü.