Maharashtra: Ganesh süngyanglu tzü nung inoktsüdang nisung 16 arakset

Mumbai/Nagpur, September 16 (Agencies): Shiti kolak keta aliba Hindu nunger Ganesh tsüngrem süngyanglu merirjang aika tzü nung inoktsüdang Maharashtra tesem aika nung tajemba agi nisung 16 tashi süogo aser nisung ana samaogo, ta ketdangsertem osang ka ajanga metetdaktsü.
Nashik nung süngyanglu tzü nung inoktsüdang tajemba agi nisung tenet asü.
Sepai, Sandeep Shirsat aser S. Rameshwar na Musalgaon nung aliba awatsüng ka nung arakseta asü aser district kübok yim balala nungi Nilesh Patil, Bhushan Kasbe, Sumit Pawar, Amol Patil aser Roshan Salve nungera arakseta asü.
Ano Wardha district nunga Ganesh tsüngrem süngyanglu den ‘selfie’ tangokdang school tanur asem ayong nung arakseta süogo.
Ano Nanded nung aliba Godavari ayong nung Ganesh tsüngrem süngyanglu tzü nung inoktsüdang Waluj nungi school tesayur, Parmeshwar Shengule arakseta asü.
Jalgaon nunga Kaang ayong nung lanur ana tzü agi ponger ao. Tasümang kabo nguogo aser ka bushidar.
Pune nunga süngyanglu tzü nung inoktsüdang lanur ana samaogo.
Iba dak alia iba sentong dak sentakba balala nung Nagpur nung tetsür ka aser Budha Nagar nung tetsür chanu ka asü.
Taoba ghonda 24 tsüngda Ganesha tsüngrem süngyanglu merirjang aika tzü nung inokja Hokolbar anepdang iba sentong tembangogo.