Maharashtra kin rongrong ken o nung Hindutva lenir apu

Pune, Metsüremi 14 (Agencies): Bail nung chioktsü asoshi mepeshiba Supreme Court-i magizükba sülen mapang talangka melie Aenjeti (January) 1 nü Bhima-Koregaon kin azüdokshi adokdaktsüba nung shilem agi, ta aija alisang aser Hindutva lenir Milind Ekbote ya Pune Rural police temi Rasemnü (Wednesday) puogo, ta ketdangsertemi ashi. Pa ya Rasemnü nikongdang local court ka nung ken o jembiba mapang oa adentsü liasü, ta parnoki shisem.
Ibai Aenjeti 1 nungi tenzüka kin tsüngda rongrong adokdaktsüba ken o nung aibelen tulu malirtembo agientsü, ta Maharashtra Chief Minister Devendra Fadnavis-i sangdonger anogo ka dang lir atalok.
Arishi küm 60 tain Ekbote ya Shivajinagar nung par kidang anüngdang teroto meta Pune Rural police temi apu. Sangli telok nungi lenir Sambhaji Bhide alias Guruji densema Ekbote nunger anema Dalit nunger temeden atema nokdaker, Sushma Andhare aser Anita Salve nati FIR ama benokba sülen pa ya apu. Iba FIR ya Pune city police nem Aenjeti nung agütsü aser ken o bushisüngdangtsü aser tanga mapa inyaktsü asoshi Pune Rural police dangi transfer asü.
Peshwa Bajirao II indang mitkartem madak East India Company nungi sepai ishika den Dalit nunger aika densemer takok anguba Anglo-Maratha War ataloker küm 200 ajungba anogomung amungba mapang parnoki asalentong yanglua azüdokshidaktsü, ta ken o benoker temi shia lir.
Tamalena Pune Rural police temi Ekbote ya ponguben tashi jaoka liasü, saka pai khen dang aru. Pai Pune Sessions Court nung anticipatory bail meshi saka Aenjeti 22 nung magizük aser Bombay High Court-ia Tsüklai 2 nung magizük. Iba sülen Pune court-i Ekbote ya aputsü totuyuba agütsü.