Maharashtra nung anogo shi aluyimer 9 shi asür

April 06 (Agencies) : Kanga dang taoksatsüka 2015 küm Maharashtra nung aluyimer 3,228 tashi soseta süogo. 2001 küm nungi tang tashi nung soseta asür rongnung 2015 küm timba liasü, ta Rajya Sabha-i March 4, 2016 nü Rajya Sabha nung osang agütsüba nung tejangja zülua lir aser state nung soseta asüba ajakji kodang asadangdir anogo shia nisung 9 soset asür amai asadangteter.
2015 küm soseta asüba ya 2014 küm Taliban teloki nisung kahsetba tera agi dang memenep, ta IndiaSpend osang ajanga ashi.
Maharastra nung Vidarbha aser Marathwada tesemtem nung aluyimer million 5.7 liasü, ajisüaka 2015 küm noklang nung shilem 83 soseta süogo.
Maharastra ya tesem pongu küma lemsa-a lir aser tesem shia nung administrative division trok lir. Itemji Konkan, Pune, Nashik, Marathwada (Aurangabad) aser Vidarbha (Amravati aser Nagpur) tesemtem lir.
2015 küm Vidarbha tesem nung aliba aluyimertem 1,541 soseta asübaji tesem ajak dang nungi timba liasü. Nagpur nung 362 aser Amravati nung 1,179 soseta asübaji Vidarbha tesem nung timba liasü.
Vidarbha sülen Marathwada (Aurangabad) tesem nung aluyimer nisung 1,130 asü.
Marathwada tesem nung taküm January ita nunga aluyimer parnok nisung 89 tashi soseta süogo. Sorkari parnok teinyaktsü shitak meinyaktetba aser parnok tashi maitba ajanga item tasüba ya ataloker, ta state sorkari shima yutsüba Farmers Distress Management Task Force-i ashi.
2014 kümbo anogo shia nisung 15 soseta asü amai asadangtetogo.
2014 küm India nunger aluyimer parnok nisung 5,650 soseta süogo aser ibaji asadangdang anogo nung nisung 15 asür amai adoker, ta National Crime Records Bureau (NCRB)-i metetdaktsü.
Aluyimertem yamai soseta sütepba ya tebilemtsü tongtibang pongu ajanga lir.
(1). Sentsü aliba agi nisung 1,163, (2). kibong tebilemtsü agi nisung 1,135, (3). aluyimba mapa nung tetsükdaktsü aser tebilemtsü ajuruba ajanga nisung 969, (4). Shirang balala atalokba agi nisung 745 aser (5). Temesepba chiyungtsü chia ajemba agi nisung 250 soseta asüba asadangtetogo.
2014 küm Maharashtra sülen state pezü nung aluyimertem soseta asüba yamai lir, Telangana nung 898, Madhya Pradesh nung 826, Chhattisgarh nung 443 aser Karnataka nung 321.
2014 küm item state pongu nung aluyimer soseta asübaji kodang asadangdir linük nung aluyimer noklang nung shilem 89 soseta asü amai asadangteter.