Maharashtra nung Criminal Tracking System tenzükogo

Nagpur, September 16 (Agencies): Maharashtra nung state sorkari police station ajak nung Crime & Criminal Tracking Network & System (CCTNS) tenzükogo.
State kati tang mezüngsüa benokba inyakyim tasenba ya amshiba ajanga tangbo police-i khen ‘click’ asüba ajanga FIR benoktettsü.
Yashi Nagpur nung sentong ka aliba mapang Maharashtra Angh, C Vidyasagar Rao-i CCTNS project tenzükja liasü. Iba sentong nung state Chief Minister, Devendra Fadnavis; Additional Chief Secretary (Home) K P Bakshi; Director General of Police, Sanjeev Dayal aser tongti ketdangsertema dena liasü.
Iba sentong nung jembidang Angh Rao-i, “CCTNS ya temzüng alema aibelen ken o timba akümba asadangba dang masü saka iba ya ajanga police force nung temelenshi adoktsü,” ta ashi.
“Iba inyakyim ajanga police ketdangsüba nung ochi ashia adoktsü,” ta pai ashi.
Paisa, iba ya ajanga police department tenüng ajungkettsü, kechiyong CCTNS project ya ‘Digital Maharashtra’ nükjidong ataloktsü atema mera ka lir, ta ashi.
Amalitep tajungba akümba aser temzüng alema aibelen ken o tem aser aibelenertem data lemsatepba ajanga state aser linük naprong ajangzüktsü, ta Rao-isa ashi.
Angh-isa, “Tang putu 21 buba nung police-i ayongzükbatem koktettsü atema aser sensotem kümzüka alitsü aser ozüng benshitsü atema asenoki yimya awashi tajung aliba, terenemshiba junga agiba aser terenlok aliba police force nüngdaker,” ta ashi.
Iba sentong nungsa Chief Minister Fadnavis-i, tang tasa tasen amshiba ajanga nükjidong ataloktsü aser CCTNS ajanga police khuret pungbatsü, ta ashi.