Maharashtra nung injang ayudak mi lendong nung 17 asü

New Delhi, May 31 (Agencies): Maharashtra, Pulgaon nung injang rizüngdak tesem nung mi lendong tulu adokba ajanga nisung 17 asü aser nisung 19 yiruba sülen iba tatalokba bushisüngdangtsü atema tuyuogo.
Iba lendong atalokdang Defence Minister, Manohar Parrikar Pune nung liasü aser pa Pulgaon-i ilonga oa tensa reprangshimogo.
Mongolbar anepdang züngia 1:30 ako meta Pulgaon nung aliba Central Ammunition Depot nung mi adoka liasü.
Asürtem rongnung sepai ketdangser ana aser 15 Defence Security Corps (DSC) nungi sepaitem densema lir, ta Defence osang ajanga ashi.
Iba lendong nung asür ketdangser anaji Lt Col RS Pawar aser Major K Manoj na lir ta osang jangjaogo.
Yirua alirtem rongnung sepai  ketdangser ana den DSC sepai 17 lir.
Injang ayuba takdang ka nung mi adoka liasü, ta Defence ketdangsertemi ashi.
Iba tatalokba kuli bushisüngdangtsü atema Special Investigation Team (SIT) ka tentetogo.
Iba osang angazüka Ato kilonser, Narendra Modi-i twitter ajanga asür kibongtem den asüko osang lemsatepogo.
Pulgaon nung aliba Central Ammunition Depot ya India nunger injang aser prangpong rizüngba tesem tulu rongnung ka lir.