Maharashtra nung kaketshir 14 tzü nung arakset

Raigad (Maharashtra), Feb. 01, 2016 : Mumbai nungi kilometer 150 shi pilar Raigad district kübok Murud Beach anasa Arabian Sea nung picnic-i aoer college kaketshir 130 rongnungi tajemba agi kaketshir 14 tanü nikongdang 4:00 ako meta arakseta süogo, ta taonung Raigad police-i metetdaktsü.
Ano kaketshir 10-12 shi samar mangur, ta police-isa ashi.
Indian Navy aser Indian Coast Guard-i Chetak helicopter aser speed boat ka amshiba den külemi tzü telungi ayir police tem densema nisungtem kümzüktsü maparen inyakdar.
Tang tashi nung tetsür 10 tasümang aser tebur asem tasümang atsütetogo aser kaketshir pongu temang anepaluogo, ta police-isa ashi.
Iba lendong atalokba kuli tang tashi mejangjateti lir.
Maharashtra Cosmopolitan Education Society indang Abeda Inamdar College nungi kaketshir 130 südoksünema kazütsü atema Murud tzüyimkümi arua liasü, ta Superintendent of Police, Suvez Haque-i ashi.
Osangbenertem den jembidang College Tir, PA Inamdar-i, B.Sc. (Computer Science) aser BCA (Computer Applications) azünger mezüngbuba küm, tanabuba aser kümsembuba azünger senior kaketshir parnok 130 college-i sponsor asüba annual picnic atema ao, parnok den staff züngsem pongu den tanga staff kar densema lir, ta ashi.
“Iba tatalokba ajanga onok aoksar. Kaketshir aser parnok kibongtem yaritsü atema onoki yimtaklirtem aser police teyari agia meranga inyakdar. Ozü college ketdangsertem telok ka Pune nungi apusoa Raigad-i ogo,” ta Inamdar-isa ashi. Takoksa ajurur tsüraburtem kar college campus-i ao aser kar Murud tzüyimküm jagi ogo.