Maharashtra nung opposition MLA 5 mapa nungi anen

Mumbai, Chiteni/July 30 (Agencies): Maharashtra nung opposition MLA pezü; NCP nungi asem aser Congress nungi ka ta resign asüba sülen state election magi tsüngda BJP pur jenjang tashi taitba kümogo. Parnoki tanü mapa nungi anenba shiti agütsüogo aser Bodhbarnü Mumbai nung BJP den adentsü imlar.
NCP MLA; Vaibhav Pichad, Shivendra Raje Bhosale aser Sandeep Naik nungeri tanü party toktsüba ajanga NCP dak kanga mejungi kongshiogo. Taoba hopta NCP Mumbai tekolakba Sachin Ahir party toktsür Shiv Sena nung dena liasü.
Tanü mapa nungi anenba NCP MLA asem ya BJP ticket bener taruba state election nung tokteptsü imlar. Parnok asemprongla ya NCP nung kanga tongtibang lir aser parnok kinungertem party lenir tejentem lir.
Taoba Maharashtra NCP tekolak Madhukar Pichad’er jabaso Vaibhav Pichad-i ashiba agi, pa BJP nung adentsü asoshi telemtetba agiogo kechiyong Chief Minister Devendra Fadnavis-i par constituency nung ken o tem bentettsütsü ta nangzükogo. Pa Ahmednagar district kübok Akole assembly constituency nungi lir.
Pa tebu Madhukar Pichad-a BJP nung adentsü imlar.
Sandeep Naik ya Navi Mumbai nungi NCP lenir tejen Ganesh Naik’er kinunger lir aser Shivendra Raje Bhosale o Satara nungi NCP MLA Udayan Raje Bhosale na adianuna chir lir.
Assembly Speaker Haribhau Bagade den senden ka amenba sülen parnok asem ya mapa nungi anenogo. NCP lenir tejen Ajit Pawar, shiba party tekolakba, pa ya Sharad Pawar indang adianu lir pai Bhosale NCP nung maneni inyaksangshitsü ta ashiba sülen anogo ka lir tang pa mapa nungi anenogo.
Wadala, nungi Congress MLA Kalidas Kolambkar ya opposition MLA pezü mapa nungi anener rongnung densema lir. Kolambkar ya Shiv Sainik nung züngsem ka liasü saka iba party toktsür Congress nung 2004 küm aden. Wadala nungi MLA tenetben tashi adoker alisang ya BJP nung adentsü ta osang ajanga metetdaktsüogo.
Tawa tembangba national elections nung pai Shiv Sena candidate Rahul Shewale atema nübuyimja liasü. Kolambkar-i ashiba agi, chief minister ka ama Devendra Fadnavis lenisüba kübok state renloka aotsü.
MLA tem dak alia Navi Mumbai nungi corporators 57; NCP nungi 52 aser independent nungi 5 ta BJP nung adentsü. Iba ajanga Navi Mumbai Municipal Corporation nung BJP züngsem timba akümtsü.