Maharashtra nung rara adokbaji BJP aser RSS ajanga lir: Mayawati

Lucknow, January 03 (Agencies): Bodbarnü Bahujan Samaj Party (BSP) tongti lenir, Mayawati-i, Pune aser Maharashtra tesem balala nung BJP aser Rashtriya Swayamsevak Sangh (RSS)-i rara adokdaktsür, ta aitsü.
Lai sangdong ka ajanga, “Item tatalokbatem jelia nokdangteter lila, ajisüaka state sorkari jelia teinyaktsü meinyak, kechiyong lokti telemsa balala nung ajemdaker rara adokdaktsüba nungji Bharatiya Janata Party (BJP) sorkar densema lir,” ta ashi.
Laisa, BJP aser parnok den tesendaktep teloktemi Dalit nunger takar putiotsü samatsütsü meranger, kechiyong parnoki Dalit nunger senmang melidaktsüner, mesüra taküm akhüm meketdaktsüner, ta aitsü.
Tamalen Uttar Pradesh Chief Minister pezüben tashi inyakla, Mayawati-isa item rara nung asür kibong den mangyim tejashi lemsatepogo.
Item rara nung yirua alirtem nem tekaratiba nung teyari agütsütsüla ta shia BSP tongtiisa item rara adokdaktsürtem tekaratiba nung aputsü takhangba agütsü.
“Rara adokdaktsürtem nem tansütsüsa temerenshi agütsütsüla, ajisüaka BJP dang nungi ibaji meimlar,” ta laisa ashi.