Maharashtra nung sorkar akümtsü atema asüngdangtsü: NCP

Mumbai, Yimpoksüi/November 22 (Agencies): Hokolbar aonung tesü mesüra Honibar anepdang Shiv Sena-NCP-Congress teloktepi Maharashtra nung sorkar akümtsü atema state Angh dang asüngdangtsü, ta Hokolbar NCP otongdar, Nawab Malik-i metetdaktsü.
Malik-isa, party asempronglai sorkar kümsük pongu abensatsüsa inyaktsü, ta metetdaktsü.
“Hokolbar nikongdang party asem nungi lenirtem senden ka menogo aser tatembangbuba telemtetba agitsü atema jembiogo. Onoki taonung tesü mesüra asüngnep (Angh dang) sorkar akümtsü atema asüngdangtsü,” ta Malik-i ashi.
Paisa, Chief Minister mendenji Shiv Sena nem agütsütsü, ta ashi.
Shiv Sena aser NCP nati küm ana ser tesadang lemsaa chief minister inyaktsü, ta olulu prokba dak sendakba nung Malik-i, “Party asem atema ibaji tongtibang onük ka masü, saka sorkar küm pongu abensaa inyaktsüji tongtibangba,” ta ashi.
Shiv Sena, NCP aser Congress teloktep nung mendenji majority mark- 145 dang nungi timba lir.
Tang Maharashtra ya President’s rule kübok lir.