Maharashtra Resident Doctor 3,000-i lungkak aiter

Mumbai, March 21 (Agencies) : Maharashtra nung sorkar mozükitem tanü agi anogo anabuba resident doctor temi lungkak aitba ajanga timtem kanga ajuruogo.
Shiranger kinungertem parnok dak teka sangshiba anema doctor temi lokti Casual Leave lungkak aiter.
Sorkari parnok kümzüka ayutsü atema telemtetba kecha magiba agi resident doctor temi tanü agi anogo anabuba Casual Leave agia lungkak ait, ta Maharashtra Association of Resident Doctors (MARD) tanishir Swapnil Meshram-i ashi.
Ajisüaka, Hombarnü social activist kati Bombay High Court nung doctor temi lungkak aitba anema public interest writ petition ka benokogo.
Hopta ka tsüngda Maharashtra nung resident doctor pungu dak teka sangshi, ta Indian Medical Association (Youth) state President Sagar Mundada-ia osangbener dang ashi.
Hombarnü MARD mendenpurtemi Mayor Vishwanath Mahadeshwar aser Brihanmumbai Municipal Corporation (BMC) nunger den ajurutepa ozüng alema inyakertem azüoktsü aser shiranger meina arurtem telatet ka yanglutsü atema takhangba agütsü.
Iba asoshi ketdangsertemi nisung anati dang shiranger meintsü aser parnok ket nung ‘special pass’ agütsütsü aser pass malirtem ozüng agi merenshitsü lemtet, ta Additional Municipal Commissioner I.A. Kundan-i ashi.
Mumbai nung aliba mozükitem anüktsü atema BMC-i Maharashtra State Security Force nungi nübo talila 500 shi meshisemtsü lemtet.
Mumbai nung doctor temi lungkak aitba ajanga timtem kanga ajuruba sorkar mozükitemji- KEM, Sion LTMG, Nair aser Sir JJ Group lir.