Maharashtra sorkar atema Nov 22 nü lemtettsü: Congress

New Delhi, November 21 (Agencies): Maharashtra nung sorkar mekümteti mapang talangka aruba sülen kobi melii state nung sorkar akümtsü akok, kechiyong Brihostibarnü Congress lenir, Prithviraj Chavan-i, Congress aser party teloktep Nationalist Congress Party nati onük ajak nung jembnishinü tembangogo, aser state nung sorkar akümtsü atema Congress aser NCP na tsüngda mangatettep kecha mali, ta metetdaktsü.
Chavan-isa, party anati lemtetbatemji Shiv Sena lenirtem nem-a metetdaktsüogo, ta ashi.
“Congress aser NCP nati onük ajak nung o lemtepba tembangogo. Mangatettep kecha mali. Asüng (Hokolbar) Mumbai nung onoki (Congress) ozü teloktep party tem (Sena aser NCP) den senden amentsü. Nikongdang onoki Shiv Sena den o lemteptsü,” ta Chavan-i osangbenertem nem metetdaktsü.
Taoba mapang Maharashtra Chief Minister, Chavan-isa, state nung sorkar akümtsü atema tatembangbuba atelemtetbaji asüng (November 22) agitsü. Iba anogo nungji onoki
Common Minimum Programme (CMP) sangdongtsü aser party asem tsüngda portfolio lemsaba metetdaktsütsü,” ta ashi.
Delhi nung Congress Working Committee senden amenba sülen Chavan-i iatem osang ya metetdaktsü. Maharashtra yimtenren tensa asadangtsü atema tanü Congress Tir, Sonia Gandhi-i iba senden ya ayongzüka liasü.
Congress Working Committee senden nung yashi Congress aser NCP na senden nung lemtetbatem metetdaktsü. Iba senden nung Congress-i Shiv Sena aser NCP teloktep sorkar yaritsü lemteta liasü.
Chief Minister menden nung mangatettep adoka Shiv Sena-i BJP den ateloktep raksaba sülen Shiv Sena-i sorkar akümtsü atema Congress aser NCP teyari bushia liasü. Iba sülen party asem tsüngda tesüiba anogo 10 tashi senden aika mena aruogo.
Osang angazükba agi, Shiv Sena, Congress aser NCP tsüngda telemtetba agiogo aser chief minister mendenji Sena-i küm ana ser tesadang aser NCP-ias küm ana ser tesadang abentsü aser kümsük abensaa (küm 5) Congress nem Deputy Chief Minister menden agütsütsü.